A Xunta presentará nunha xornada os resultados do programa de promoción do cooperativismo a través do I+D+i, que se desenvolveu durante este ano. As cooperativas beneficiáronse de actividades como a formación mixta (e-learning e presencial), creación de redes; asesoramento personalizado e tutorización.

A iniciativa, impulsada polas direccións xerais de Relacións Laborais e de I+D+i, permitiu que as cooperativas interesadas en executar as súas ideas innovadoras tivesen apoio na procura de socios tecnolóxicos axeitados e de fontes de financiamento.

Antes de que remate o ano un total de 53 concellos das catro provincias galegas formalizarán a súa adhesión á Rede de Centros para a Modernización e Inclusión Tecnolóxica (CeMit) que pon en marcha a Xunta para facilitar o acceso ás novas tecnoloxías de todos os galegos. A Rede, que iniciará a súa actividade o vindeiro ano, contará cun orzamento de 963.175 euros en 2011.

Un equipo de técnicos dos 9 países europeos que participan no proxecto INTERREG IV Digital Local Agenda vistarán Galicia o vindeiro mes de febreiro para coñecer a experiencia de implantación do Historial Médico Electrónico na Comunidade, tras elixir este procedemento como o mellor exemplo de boas prácticas entre un total de 37 iniciativas relacionadas coa sociedade da información.

Coa intención de favorecer o uso do galego nas mensaxes de felicitación de Nadal nos novos formatos e a través das tecnoloxías da información e da comunicación, a Secretaría Xeral de Política Lingüística convoca un concurso de presentacións electrónicas de Nadal.

O conselleiro de Educación e Ordenación Universitaria, Xesús Vázquez Abad, comprobou hoxe os beneficios que a ampliación da velocidade de conexión a internet que a Xunta de Galicia está a desenvolver ten no día a día dos centros de ensino. Así, o conselleiro visitou os IES As Lagoas, en Ourense, e Ánxel Fole, en Lugo, onde se vén de mellorar dita conexión pasando dos 10 aos 100 Mbps, co fin de acadar un uso máis produtivo das novas tecnoloxías da información e a comunicación (TIC) que se utilizan como recursos educativos nestes institutos.

O delegado territorial da Xunta en Ourense, Rogelio Martínez, inaugurou esta mañá a exposición itinerante e interactiva da Secretaría Xeral de Medios, Galiciadixital, que poderá visitarse en ASPANAS.

Durante o acto de inauguración, Martínez lembrou que todos os contidos que se exhiben na mostra están feitos por empresas e universidades galegas e amosou a súa satisfacción porque esta mostra recalase nun centro de persoas con discapacidade, en ASPANAS.

A valorización dos subprodutos pesqueiros e as súas aplicacións industriais abordáronse hoxe nun seminario organizado polo Centro Tecnolóxico do Mar en Vigo no marco do proxecto IBEROMARE, iniciativa na que a Fundación galega traballa xunto a entidades de España e Portugal cara a xerar propostas para valorizar recursos mariños non aproveitados ata agora. Nesta liña discorreron os relatorios de hoxe, nos que os expertos defenderon a unión do sector pesqueiro cara a conseguir eses obxectivos.

O Conselleiro de Presidencia, Administración Públicas e Xustiza, Alfonso Rueda, mantivo esta mañá un encontro con representantes da Fundación Elecnor, na que exploraron vías de colaboración entre ambas entidades en materia de cooperación.

O conselleiro estivo acompañado polo director xeral de Relacións Exteriores e coa UE, Jesús Gamallo, mentres que pola parte da Fundación achegáronse ata a Xunta de Galicia o seu director, o astronauta Pedro Duque, e o seu secretario xeral, Fernando Aragonés.

O conselleiro de Economía e Industria, Javier Guerra, vén de asinar un convenio de colaboración coa Federación Galega de Comercio que permitirá a posta en marcha dunha campaña que inclúe un programa de dinamización do consumo, a celebración de seminarios e xornadas formativas e informativas para os comerciantes e o desenvolvemento da web do Portal do Comercio Galego.

A Xunta, a través do portal da administración local de Galicia “Eidolocal”, vén de habilitar un novo servizo de adhesión en liña ao convenio de colaboración entre a Xunta de Galicia e a Fegamp para o desenvolvemento da administración electrónica nas entidades locais da Comunidade autónoma de Galicia.