O Consello da Xunta aprobou onte o decreto polo que se crea e regula o Observatorio da Sociedade da Información e a Modernización de Galicia como órgano encargado de avaliar a incorporación das novas tecnoloxías á sociedade e o desenvolvemento da Administración electrónica. Esta nova entidade é o resultado da integración do Observatorio Galego da Sociedade da Información co Observatorio da Calidade e da eAdministración de Galicia, que atendían ámbitos cada vez máis próximos, facendo necesaria unha actuación máis eficiente que evitase a superposición de ambas as actuacións.

Desde o inicio dos apagados dixitais o pasado 18 de xaneiro e ata o día 4 de febreiro máis de 7000 persoas foron atendidas nos teléfonos de información sobre a TDT postos a disposición dos cidadáns pola Xunta de Galicia. A media de chamadas diarias situouse entre as 250 e as 300 superando as 500 nalgunhas das xornadas dos apagados.

A páxina web de escolas infantís. www.escolasinfantís.net, á que a Xunta está a darlle un pulo, rexistrou nos últimos catro meses, entre setembro de 2009 e finais de xaneiro de 2010, preto de 75.000 visitas de usuarios diferentes. A media de visitas á páxina foi de 700 ao día.

A páxina ofrece unha información variada e actual da rede de escolas infantís da Administración autonómica.

A Dirección Xeral de Xuventude e Voluntariado está organizar entre os estudantes de ESO e Bacharelato a primeira edición do Parlamento Xove, unha iniciativa que pretende potenciar o diálogo como ferramenta de ideas propias entre a mocidade galega.

Parlamento Xove é unha competición entre centros de ensino da comunidade autónoma na que os participantes deberán integrarse en diversos equipos para investigar, escribir e debater sobre o tema proposto pola organización, que será se o uso das redes sociais separa ou une á mocidade.

A Consellería de Cultura e Turismo acaba de poñer en marcha, a través da Secretaría Xeral para o Turismo, o lanzamento dun boletín informativo electrónico dirixido ao sector turístico. A newsletter, que será actualizada de maneira regular e enviada a todas as asociacións e entidades do sector que así o requiran, incluirá información práctica sobre os proxectos, campañas, ordes de axudas e demais actividades de interese realizados pola Consellería de Cultura e Turismo a través da Secretaria Xeral para o Turismo.

O director xeral de I+D+I, Ricardo Capilla, presentou esta mañá o proxecto TECMEVA (Tecnoloxías Médicas de Vangarda), que suporá a posta en marcha durante este ano 2010 dun Centro de Investigación en Novas Tecnoloxías Cirúrxicas Minimamente Invasivas na Tecnópole. Capilla, tamén vicepresidente do Parque Tecnolóxico de Galicia, asegurou que a nova instalación científico-tecnolóxica que se ubicará no edificio Tecnópole I, no concello ourensán de San Cibrao das Viñas, é “punteira na súa especialidade en Galicia”.

A mostra itinerante da Secretaría Xeral de Medios, Galiciadixital, continúa coa súa andadura polos complexos hospitalarios galegos e poderá visitarse dende hoxe e ata o vindeiro domingo 14 de febreiro no Hospital Abente y Lago da Coruña.

O Centro Multimedia de Galicia (CMG), dependente da Secretaría Xeral de Medios, acollerá mañá, venres 12 de febreiro, un curso para instaladores da Televisión Dixital Terrestre vía satélite (SAT-TDT). Esta xornada poderá ser seguida a través de videoconferencia nos Telecentros de Comunicación (TC) de Lugo, Allariz, A Coruña, situado na Biblioteca Pública Miguel González Garcés (BPMGG), e no da Escola Técnica Superior de Enxeñeiros de Telecomunicacións (ETSET) de Vigo.

A conselleira de Facenda, Marta Fernández Currás,  e a secretaria xeral de Innovación Tecnolóxica, Mar Pereira,asistirón á II Noite da Enxeñaría en Informática de Galicia. No decurso do acto, Marta Fernández recolleu o premio ao Proxecto Innovador polo Sistema Electrónico de Facturación, mentres que Mar Pereira foi a encargada de recoller o premio á Iniciativa da Administración que o Colexio de Enxeñeiros en Informática lle concedeu este ano a 2014.gal Axenda Dixital de Galicia, a estratexia tecnolóxica global da Xunta de Galicia.

Un proxecto que pretende recompilar e transmitir os beneficios das tradicionais herbas medicinais, un testemuño audiovisual de mulleres que narran lembranzas da súa vida desde una perspectiva de xénero, e un blog que recolle a historia dunha comarca a través das experiencias dos seus habitantes, son as tres iniciativas que gañaron o II Concurso ‘Mayores cON Iniciativa’ Galicia 2009.