Os nenos galegos poderán falar con Papá Noel a través de videoconferencia grazas a unha iniciativa do Centro Multimedia de Galicia, que aproveita estas datas para poñer ao servizo dos máis pequenos os telecentros de comunicación (TC) que ten distribuídos por toda a xeografía galega. Polo momento, participan nesta iniciativa, que se levará a cabo a vindeira semana, os TC de Brión, Abegondo, Oroso, Verín, A Fonsagrada, Catoira, Quiroga, Lugo, Carballo, A Estrada, O Barco de Valdeorras, Foz, Monterroso, Betanzos, Muros, Becerreá, Vimianzo, Ourense, Negreira, Lalín, Chantada, A Cañiza, Redondela e Marín.

Dende Laponia e en tempo real, Papá Noel atenderá en directo as preguntas e demandas de todos os nenos que se acheguen para falar con el dende os telecentros de comunicación dos seus concellos. Trátase dunha iniciativa máis da campaña Comunícate coa que a Secretaría Xeral de Medios pretende dar a coñecer todas as posibilidades que ofrecen os telecentros de comunicación.

A través desta campaña preténdese converter os telecentros de comunicación (TC) en puntos de referencia, dentro de cada concello, como lugares de encontro, de formación e de promoción do audiovisual galego.

Asociacións e colectivos de todo tipo poden utilizar os telecentros de comunicación para realizar cursos, roldas de prensa, videoconferencias, reunións de traballo, etc…

Telecentro de comunicación
Un TC é un espazo acondicionado acusticamente e de estética particular que dispón de material informático (ordenadores, impresoras, etc.), equipo de videoconferencia, material audiovisual, pantallas de proxección e de plasma, así como outros sistemas de control que permiten recrear diferentes escenarios (accións formativas, videoconferencias, visionado de audiovisuais ou multimedia) dependendo das necesidades técnicas do evento que se queira desenvolver.