O Colexio Profesional de Enxeñaría Técnica en Informática de Galicia (CPETIG) celebrará os días 22 e 23 de maio senllos seminarios en Santiago de Compostela e Vigo para formar a profesionais da Administración de xustiza en protección de datos, a aplicación da e-Administración e o expediente electrónico.

O presidente da Xunta, Alberto Núñez Feijóo, avanzou hoxe que en xaneiro de 2015 se producirá o acendido da Rede Corporativa de Comunicacións Móbiles Dixitais de Emerxencia e Seguridade de Galicia, que permitirá dotar a Comunidade do sistema de comunicacións máis moderno de España e coa tecnoloxía máis punteira. Así o dixo na rolda de prensa posterior ao Consello da Xunta, que hoxe aprobou o Plan de explotación da rede, co obxectivo de que ao longo deste ano se instale a infraestrutura necesaria para que a plataforma comece a funcionar.

O presidente da Xunta, Alberto Núñez Feijóo, salientou hoxe que o dominio .gal ofrece vantaxes competitivas para empresas e emprendedores, leva o nome de Galicia á rede e permite que a lingua e a cultura galegas gañen en “proxección” e en “visibilidade” no gran mapa de comunicación global que supón a internet.

O Centro Demostrador TIC, que xestiona a Axencia para a Modernización Tecnolóxica de Galicia (Amtega), acollerá o día 23 de maio o seminario “Creación, desenvolvemento e comercialización de produtos TIC en software libre” (https://cdtic.xunta.es/comercializacion-software-libre) que se impartirá en horario de 12.00 a 14.00 horas.

A Rede de Centros para a Modernización e a Inclusión Tecnolóxica (CeMIT) inicia hoxe a primeira edición do curso de teleformación para á obtención da certificación galega en competencias dixitais en ofimática (CODIX), dirixida aos responsables das aulas CeMIT e das entidades colaboradoras e de acción voluntaria da Axencia para a Modernización Tecnolóxica de Galicia (Amtega).

Galicia acolleu esta semana a primeira formación a axentes sociais que traballan con persoas maiores dentro do proxecto europeo ACTing, que busca proporcionar a estes profesionais unha metodoloxía adaptada a este colectivo para promover o envellecemento activo a través do uso das novas tecnoloxías.

Desde hoxe xa se poden consultar en datos.gob.es os conxuntos de datos abertos que a Xunta de Galicia publica a través do seu portal Open Data, Abert@s. A publicación destes conxuntos de datos é posible grazas á federación entre o Catálogo de Datos abertos da Xunta de Galicia e o Catálogo de datos de datos.gob.es, unha iniciativa do Ministerio de Facenda e Administracións Públicas e do Ministerio de Industria, Enerxía e Turismo, xestionada por rede.es, para impulsar a publicación e reutilización da información que facilita en sector público.

O Centro Demostrador TIC, que xestiona a Axencia para a Modernización Tecnolóxica de Galicia, acollerá o día 28 de maio o curso “Aforro + Xestión + Alta dispoñibilidade é posible unificando as túas comunicacións” (https://cdtic.xunta.es/es/cie-tecnologias). A xornada, na que se realizará un percorrido por diferentes solucións tecnolóxicas dispoñibles para optimizar a xestión das comunicacións na empresa, impartirase en horario de 10.00 a 14.10 horas.

A Xunta de Galicia leva mobilizado no período 2009-2013 un investimento de preto de 1.100 millóns nas actuacións definidas na Axenda Dixital de Galicia, 2014.gal, para consolidar a modernización tecnolóxica da Administración e dos servizos públicos, a inclusión e capacitación dixital da poboación, o impulso do hipersector TIC como elemento tractor dos restantes sectores produtivos e o despregamento de infraestruturas de telecomunicación na Comunidade.

#NEThinking regresa os días 29 e 30 de maio á Illa de San Simón, no concello pontevedrés de Redondela, para celebrar a quinta edición deste foro de referencia baseado no debate multidisciplinar e aberto sobre o contorno dixital. Promovido pola Consellería de Cultura, Educación e Ordenación Universitaria, a través da Secretaría Xeral de Cultura, #NEThinking botará a vista atrás ao longo deste último lustro para reflexionar sobre os cambios na internet, así como nos códigos, linguaxes, relacións e negocios no camiño virtual.