A Xunta de Galicia pon en marcha un novo portal, iMit, onde recolle todas as súas iniciativas e servizos en materia de tecnoloxías da nova información e a comunicación. O obxectivo deste proxecto é poñer ao servizo da sociedade galega un espazo web único de información en materia de sociedade da información e divulgar todas as actividades que se están a impulsar desde o Executivo autonómico nesta materia. 

A Xunta de Galicia, a través da Secretaría Xeral de Modernización e Innovación Tecnolóxica, orientará ao conxunto dos concellos galegos na realización de proxectos relacionados coas novas tecnoloxías con cargo ao Fondo Estatal para o Emprego e a Sustentabilidade Local durante 2010. A secretaria xeral de Modernización, Mar Pereira, remitiulle ao presidente da Federación Galega de Municipios e Provincias (FEGAMP) unha Guía de Recomendacións en materia de infraestruturas para a innovación e o desenvolvemento tecnolóxico, co obxectivo de que sexa distribuída por todos os concellos.

A Xunta de Galicia, amosou durante toda esta semana a intención e o compromiso de achegar as TIC á cidadanía galega. O expositor da Xunta no evento tecnolóxico itinerante Movemento Avanza puxo á disposición dos visitantes ordenadores con acceso a internet, un punto de información, un lector de pegadas dactilares e de DNI electrónico, ademais de diferentes materiais audiovisuais.

A Xunta, a través da Secretaría Xeral de Modernización e Innovación tecnolóxica, remitiulles hoxe a todas as empresas do sector TIC galego a Guía de Recomendacións en materia de infraestruturas para a innovación e o desenvolvemento tecnolóxico.

A secretaria xeral de Modernización e Innovación Tecnolóxica, Mar Pereira, aproveitou a súa participación no foro Novas estratexias das Administracións nos servizos públicos en tempos de crise para resaltar o papel das Tecnoloxías da Información e da Comunicación (TIC) como eixo vertebrador da sociedade galega. Nesta liña, Pereira destacou a aposta do Goberno galego coa creación da propia Secretaría Xeral de Modernización que, en dependencia directa coa presidencia da Xunta, constitúe unha ferramenta de alto nivel estratéxico neste ámbito.

A Secretaría Xeral de Modernización e Innovación Tecnolóxica segue a preparar o Plan Director de Banda Larga de Galicia que comezará a executar a principios de ano, e co que prevé dar solución ás dificultades que existen na xeografía galega para acceder a internet, e que o Mapa de Infraestruturas de Telecomunicacións pon de manifesto.

Os vigueses poden disfrutar a partir de hoxe e ata o 15 de decembro dos últimos avances tecnolóxicos que ofrece a mostra itinerante Galiciadixital, organizada pola Secretaría Xeral de Medios en colaboración coa de Familia e Benestar. O secretario xeral de Medios, Alfonso Cabaleiro, e a delegada territorial da Xunta de Galicia en Vigo, Lucía Molares, inauguraron hoxe  a mostra no Centro Sociocomunitario do Calvario de Vigo que poderá visitarse gratuítamente de 10:00 a 14:00 e de 16:00 a 20:00 horas, excepto o domingo 13 que permanecerá pechada.

A secretaria xeral de Modernización e Innovación Tecnolóxica, Mar Pereira, subscribiu hoxe en Madrid a adhesión de Galicia ao Convenio do “Esquema Xudicial de Interoperabilidade e Seguridade no ámbito da Administración da Xustiza (EJIS)”. Este acordo ten o seu punto de partida no mes de setembro, cando foi asinado polo presidente do CGPJ e do Tribunal Supremo, Carlos Dívar, o ministro de Justicia, Francisco Caamaño, e o Fiscal General del Estado, Cándido Conde-Pumpido.

A xefa de Servizo de Programación Multimedia da Secretaría Xeral de Medios, Felicitas Rodríguez, e a directora do grupo de Investigación en Tecnoloxía Educativa da USC, Beatriz Cebreiro, presentaron hoxe o titorial “Formación en liña e a distancia” co obxectivo de amosar aos usuarios dos telecentros de comunicación as ferramentas e recursos existentes neste eido. O titorial foi presentado no Centro Multimedia de Galicia de Santiago de Compostela e puido seguirse a través de videoconferencia nos telecentros de comunicación de Guitiriz, Oroso, O Barco de Valdeorras, O Carballiño e Tui.

A secretaria xeral de Modernización e Innovación Tecnolóxica da Xunta de Galicia, Mar Pereira, explicou hoxe en Madrid que o Goberno galego busca, co Plan de Sistemas de Tecnoloxías da Información e a Comunicación (TIC) para a Administración de Xustiza en Galicia, ofrecer ao cidadán unha atención máis rápida, fiable e accesible.