O sector dos contidos dixitais presenta un enorme potencial polas súas múltiples aplicacións ao resto dos sectores produtivos, tanto na modernización e innovación do sector audiovisual, dos contidos culturais e do entretemento como pola capacidade de dinamizar ámbitos como o turismo, a educación ou a sanidade. Así o recoñeceu a directora da Axencia para Modernización Tecnolóxica de Galicia (Amtega), Mar Pereira, na presentación da 16ª edición do Congreso Internacional Mundos Dixitais, que se celebra na Coruña do 6 ao 8 de xullo.

A iniciativa “Rapaciñ@s: a tecnoloxía ben segura”, impulsada polo Colexio Profesional de Enxeñaría en Informática de Galicia (CPEIG) co apoio da Axencia para a Modernización Tecnolóxica de Galicia (Amtega), visitará 10 concellos de Galicia durante este mes con charlas informativas, a cargo dos colexiados do CPEIG, e obradoiros infantís baseados na tecnoloxía.

A directora da Axencia para a Modernización Tecnolóxica de Galicia (Amtega), Mar Pereira, destacou hoxe que a Axenda Dixital de Galicia 2020 investiu máis de 324 millóns de euros, 51 deles de capital privado, entre 2015 e 2016 para contribuír ao crecemento económico e á mellora social da Comunidade aplicando as vantaxes da tecnoloxía.

A Consellería de Política Social e a Axencia para a Modernización de Galicia (Amtega) colaborarán con Televés e Cruz Vermella na pilotaxe de novas prestacións de fogar dixital sociosanitario no marco do proxecto europeo Activage, que busca crear solucións tecnolóxicas que favorezan a independencia e autonomía das persoas maiores.

No marco deste proxecto en Galicia desenvolveranse e probaranse solucións de fogar dixital sociosanitario con 700 usuarios, 100 deles con necesidades puramente clínicas, 450 usuarios de prestacións sociais, e 150 con necesidades sociosanitarias.  

Un total de 40 empresas e autónomos das zonas máis illadas do rural se beneficiarán das axudas da Xunta para acceder a internet de banda larga a través de redes ultrarrápidas. A Axencia para a Modernización Tecnolóxica de Galicia (Amtega) vén de resolver a convocatoria destas axudas, que supoñen preto de 500.000 euros, o orzamento máximo dispoñible na convocatoria. As subvencións solicitadas polas empresas beneficiarias comprenden entre o 70% e o 100% dos custos das tarefas necesarias para dotar de banda larga de ata 350 Mpbs ás empresas.

O presidente da Xunta, Alberto Núñez Feijóo, avanzou hoxe, na rolda de prensa do Consello, que no vindeiro curso escolar incorporaranse ao proxecto E-Dixgal 60 novos centros, incrementando ata 154 o número de colexios que impartirán unha ensinanza completamente dixital. Así, máis de 11.600 alumnos desde 5º de Primaria a 2º de ESO beneficiaranse desta iniciativa.

Actualmente, son 7000 os nenos que aprenden co libro dixital, polo que se produce un incremento de máis de 4600 alumnos beneficiados no próximo curso 2017/18.

“Ao lado dos nosos maiores” é o nome da iniciativa que se pon en marcha este mes de xullo en diversas localidades con aula CeMIT de Galicia, grazas a colaboración do operador de telecomunicacións Orange e a Axencia para a Modernización Tecnolóxica de Galicia (Amtega).

O presidente da Xunta, Alberto Núñez Feijóo, explicou hoxe na rolda de prensa do Consello que o Goberno galego autorizou a contratación de novos contidos educativos para reforzar a plataforma do libro dixital, da que disporán 154 centros e máis de 11.600 alumnos o vindeiro curso.

A Xunta avanza na construción da Memoria Dixital de Galicia coa dixitalización de 338.000 imaxes e documentos procedentes do Catastro do Marqués de Ensenada, do Arquivo da Casa de Comercio e Banca Bengoechea e do xornal El Pueblo Gallego. O proceso de dixitalización destes fondos terá lugar durante os próximos 6 meses e ao seu remate estarán dispoñibles para a súa consulta a través do portal Galiciana, punto único de consulta dos fondos da biblioteca dixital e do arquivo dixital de Galicia.

O 78,6% dos fogares galegos contan con acceso a Internet contratado a través de banda larga, rexistrando un incremento de máis do 10% no último ano. Este crecemento acurta a distancia coa media estatal a 2,6 puntos porcentuais fronte os 6,4 puntos do ano 2015. Ademais, o crecemento de fogares con banda larga no período 2013-2016 en Galicia foi superior ao do conxunto do Estado e duplicou o incremento rexistrado na Unión Europea.