O Edificio Administrativo da Consellería de Sanidade acolleu hoxe unha xornada sobre a Rede Española de Axencias de Avaliación de Tecnoloxías Sanitarias e prestacións do Sistema Nacional de Saúde: Garantía de Sostenibilidade, que contou coa presenza da directora xeral de Innovación e Xestión da Saúde Pública da Consellería de Sanidade, Sonia Martínez Arca.

A Axencia para a Modernización Tecnolóxica de Galicia (Amtega) completou a implantación de redes de nova xeración con 100 Mbps de velocidade en 6 centros educativos das provincias de Coruña, Pontevedra e Ourense, que se suman aos 199 centros aos que xa se lles facilitara o acceso a esta tecnoloxía no último ano.

A mellora destas infraestruturas de telecomunicación posibilita, ademais do incremento da velocidade de conexión, o acceso simultáneo dun maior número de usuarios e a posibilidade de traballar cun maior número de aplicacións informáticas.

O Consello da Xunta acordou esta mañá que a Axencia para a Modernización Tecnolóxica de Galicia (AMTEGA) será o organismo encargado da tramitación, xestión, mantemento ou retirada de aplicacións para móbiles e outros dispositivos electrónicos de calquera organismos da Administración autonómica para plataformas Android e iOS que se publicarán baixo a denominación única de Xunta de Galicia.

A Consellería de Traballo e Benestar organizará a partir do luns diversos showrooms sobre avances TIC en materia de servizos sociais que consistirán na realización de tres xornadas informativas/demostrativas sobre os sistemas de teleasistencia avanzada e teleprevención que está a promover. A actividade celebrarase o luns en Santiago, no edificio administrativo de San Caetano; o martes en Vigo, na delegación territorial da Xunta; e o mércores na Coruña, no edificio administrativo de Monelos.

O vindeiro mércores 6 de xuño, en horario de 10:00 a 14:00 horas, terá lugar no Centro Demostrador TIC (CDTIC) a xornada “Redución de custos mediante a implantación de sistemas de xestión enerxética”, organizada pola empresa Cie Tecnologías. Nesta sesión os asistentes poderán coñecer ferramentas tecnolóxicas para a xestión enerxética dos seus centros de traballo.

A Comunidade de Montes de Darbo prolongará a cesión do terreo que, actualmente ocupa no Monte da Madalena, o centro de telecomunicacións que xestiona o operador público Retegal e desde o que se veñen prestando servizos de telecomunicacións aos veciños da zona dende principios dos anos 90.

O acordo entre Retegal e a Comunidade de Montes contou coa colaboración e participación do Concello de Cangas, que asinou un convenio coa Comunidade de Montes para asumir os arranxos de camiños e desbroces do monte, o cal redundará no beneficio de todos os comuneiros e veciños do concello.

O Programa de Voluntariado Dixital da Xunta, impulsado pola Axencia para a Modernización Tecnolóxica de Galicia e a Dirección Xeral de Voluntariado, celebra o curso "Redes sociais e comunicación 2.0", que se desenvolverá entre o 6 e o 28 de xuño.

O obxectivo do curso é ofrecer unha correcta capacitación aos voluntari@s e persoal técnico das entidades de acción voluntaria adheridas ao programa Voluntariado Dixital, aínda que está aberto a calquera persoa ou organización interesada nesta materia. Ata o momento, xa hai máis de 300 inscricións formalizadas.

A representatividade das mulleres nas áreas de dirección das empresas galegas sitúase por debaixo do 30% e concentran a súa actividade maioritariamente en actividades administrativas, tamén no caso das empresas tecnolóxicas. É unha das principais conclusións do primeiro informe “A incorporación das Mulleres Tecnólogas ao mercado laboral en Galicia. As Mulleres na Sociedade da Información”.

Un total de 3.818 usuarios de smartphone descargaron entre os días 3 e 4 de xuño a nova aplicación para teléfonos intelixentes deseñada por Turismo de Galicia que permite obter información precisa para percorrer os sendeiros homologados de Galicia.

Con esta nova ferramenta Turismo de Galicia ten por obxectivo poñer en valor a práctica do sendeirismo dadas as inmellorables condicións do destino para camiñar en contacto coa natureza. Trátase dun tipo de turismo sostible e que favorece a desestacionalización.

O Diario Oficial de Galicia publica hoxe a Lei impulso e ordenación das infraestruturas e telecomunicacións de Galicia, que converte ás telecomunicacións nun servizo de primeira magnitude, garantindo o seu desenvolvemento de xeito máis coordinado, con maior planificación e máis anticipación. Esta Lei, aprobada polo Parlamento galego o pasado 14 de maio, entrará en vigor no prazo dun mes tras a súa publicación no DOG.