A Xunta de Galicia poderá destinar ata 11,8 millóns de euros nos vindeiros catro anos a afrontar as necesidades de renovación das licenzas de software que empregan os servidores virtuais da Administración autonómica, así como para a súa ampliación cando
sexa necesario, a través dun acordo marco que hoxe aprobou contratar o Consello de Goberno.
A Xunta dispón na actualidade de servidores físicos e virtuais que manteñen conectada toda a rede corporativa e se encargan de proporcionar servizos e recursos a todos os dispositivos que se empregan na Administración. Os servidores virtuais compórtanse
como os servidores convencionais, pero non dependen dunha única infraestrutura física e optimizan o uso e a dispoñibilidade do espazo e dos recursos. Este tipo de solucións é imprescindible nun contexto de crecemento dos servizos dixitais prestados polas
administracións públicas.
O uso da tecnoloxía de virtualización de servidores permite, por exemplo, que se poidan realizar actualizacións nos servidores físicos, que son equipamentos de hardware, sen que os servizos da Administración teñan que interromperse ou se poidan ver afectados, xa que as máquinas virtuais poden moverse e empregar os recursos doutros servidores físicos. Esta mesma capacidade de empregar recursos de diferentes espazos físicos reduce notablemente os problemas de rendemento asociados á saturación de servidores en momentos puntuais.
Na actualidade, a Axencia para a Modernización Tecnolóxica de Galicia dispón de máis de 6.000 servidores virtuais. Para ofrecer un servizo equivalente sen virtualización, habería que mercar, instalar, manter e renovar miles de equipamentos físicos, cada un deles cun custo elevado de adquisición, espazo, electricidade, climatización, soporte e avarías. Xa só a compra inicial dispararía enormemente o orzamento, pero os custos do mantemento implicarían un custo anual de aproximadamente 5 veces máis.
A Xunta leva xa máis dunha década empregando servidores virtuais e a súa conveniencia e eficacia foi analizada pola Axencia para a Modernización Tecnolóxica de Galicia nunha serie de proxectos piloto que confirmaron que esta tendencia global proporcionaba as solucións máis adecuadas para a contorna e a capacidade da Administración autonómica.