Máis de medio centenar de estudantes da ESO do IES Lamas de Abade de Santiago participaron hoxe na V edición da xornada Somos Cibernéticas, que organiza anualmente a Axencia para a Modernización Tecnolóxica de Galicia, co obxectivo de fomentar o aumento de vocacións femininas nas carreiras relacionadas coas tecnoloxías.
A sesión foi inaugurada por Pili Chapela, directora xerente de Redes de Telecomunicación Galegas Retegal, sociedade pública da Xunta encargada de xestionar e manter as infraestruturas de telecomunicacións na Comunidade. Chapela lembrou que soamente unha de cada catro persoas que estudan carreiras tecnolóxicas é muller e animou ás alumnas asistentes a contribuír a reverter esta situación.
Somos Cibernéticas ten como obxectivo principal fomentar o aumento do talento feminino no ámbito da ciberseguridade, explorar as diferentes opcións profesionais neste sector e reducir a fenda dixital de xénero nas carreiras científicas e tecnolóxicas. A actividade está dirixida principalmente a alumnado do 4º curso da ESO.
Durante a xornada desenvolveuse unha mesa redonda na que tres mulleres con cargos de responsabilidade relacionados coa ciberseguridade compartiron a súa experiencia. Ao final da mañá, desenvolveuse unha escape room, na que equipos de entre 5 e 7 participantes resolveron retos colaborativos nunha misión de ciberdefensa.