Actualmente 286 centros de saúde emiten receitas electrónicas en Galicia e hai 1.233 farmacias conectadas que as utilizan. Isto supón que o 71% dos cidadáns estanse a beneficiar xa das vantaxes da e-receita, segundo explicou hoxe a conselleira de Sanidade, Pilar Farjas Abadía, quen participou nunha mesa redonda sobre as novas tecnoloxías da comunicación (TIC) ao servizo do enfermo crónico no marco dunha xornada sobre a implicación do facultativo e as TIC como claves para o desenvolvemento dun novo modelo sanitario orientado a crónicos.

Así, fixo referencia ás características da sociedade galega, da que sinalou que a quinta parte ten máis de 65 anos –porcentaxe que tende a aumentar- e na que se está incrementando a proporción de pacientes pluripatolóxicos e con enfermidades crónicas, polo que se prevé un aumento da frecuentación.

Polo tanto, dixo, para adaptarse e dar resposta ás novas necesidades dos seus cidadáns, Galicia require a modernización do seu sistema sanitario, debido á permanente innovación tecnolóxica e de medicamentos, á crecente frecuentación e demanda de servizos sanitarios, ao aumento de procedementos e á complexidade das patoloxías que se abordan.

“No último ano, case a metade da poboación foi a máis dun centro de saúde beneficiándose, deste xeito, dunha historia clínica electrónica única”, destacou Pilar Farjas, afirmando tamén que a dixitalización supón unha maior eficiencia nos recursos e na atención, como amosa o feito de que o número de visitas administrativas que realizan os pacientes aos centros de saúde unha vez que as farmacias están dixitalizadas pasou dun 25% a valores por debaixo do 13%.

Así mesmo, engadiu que grazas á dixitalización do diagnóstico por imaxe tense reducido un 60% o custe respecto ao modelo tradicional de impresión de placas, e que os sistemas electrónicos de prescrición axudan a promover a utilización de medicamentos xenéricos ou de marca de menor prezo, algo que ten especial importancia nun contexto en que o crecemento do custe da asistencia sanitaria é superior ao crecemento dos recursos dispoñibles “varios puntos por encima do PIB”.

Utilización das TICs no Sergas

Na súa intervención, a responsable de Sanidade da Xunta de Galicia fixo un recorrido pola utilización das novas tecnoloxías da comunicación no Sergas. Neste sentido, citou a historia clínica electrónica, indicando que a IANUS é a plataforma de integración de sistemas e rexistro de información clínica desenvolvida polo Sergas.

A conselleira sinalou que, o pasado ano, realizáronse máis de 14 millóns de accesos de profesionais sanitarios a IANUS, e explicou que están integrados nela todos os hospitais da rede do Sergas -aos que hai que sumar dous hospitais concertados- e 420 centros de saúde (o 90% da poboación). A finais do pasado ano 2009, estaban formados e acreditados para utilizar a IANUS o 90% dos facultativos de Atención Especializada e o 96% dos de Atención Primaria; así como o 60% dos sanitarios non facultativos dos dous niveis.

Tamén fixo referencia á implantación a Plataforma Diagnóstica Integral en Radiodiagnóstico, da que destacou que serve para ofrecer un enfoque en rede e unha organización adaptada ás necesidades asistenciais, o que permite organizar as gardas en remoto –dende outros centros e desde o propio domicilio do profesional- e un mellor aproveitamento de recursos.

Farjas Abadía avogou tamén polo desenvolvemento da Administración electrónica como elemento fundamental para a modernización do funcionamento do sistema sanitario. Recordou que en Galicia están dispoñibles para a súa realización a través de Internet diversos trámites, relacionados coa tarxeta sanitaria, a solicitude de cita previa, o acceso á historia clínica, a subscrición a noticias e recordatorios de citas, o servizo de suxerencias, queixas e reclamacións, e foros de participación cidadá, entre outros.

Central de chamadas e formación a distancia

Ademais, a titular da carteira sanitaria da Xunta puxo en valor outras iniciativas como a central de chamadas, cuxa posta en marcha permitiu estender o servizo de cita previa a toda a poboación de Galicia, ofrecendo un servizo de calidade; unificar o acceso telefónico –incluída a consulta- a través dun só número de teléfono para toda a Comunidade; acadar unha maior eficiencia no servizo sen prexuízo da súa calidade; e deixar aberta a posibilidade de que, no futuro, se poidan xestionar novos servizos a través do teléfono.

Tamén fixo referencia á plataforma de formación a distancia, á Escola Galega de Saúde para Cidadáns e á plataforma Bibliosaúde, dispoñible tanto en Internet como na Intranet e que o pasado ano recibiu máis de 54.000 visitas.

“No contexto actual é necesario mellorar a eficiencia do sistema, e as tecnoloxías deben ofrecer unha maior rapidez no diagnóstico e na capacidade de resolución; unha diminución dos actos médicos, exploracións e desprazamentos; o aumento do coñecemento dos profesionais; a diminución da posibilidade de erro na prescrición médica; e unha mellora no uso dos medicamentos e nas relacións entre todos os axentes que interveñen no sistema”, afirmou a conselleira.

Así, con estes obxectivos, sinalou que as TICs son instrumentos que facilitan a equidade e universalidade do servizo, melloran a produtividade, contribúen a implantar cambios organizativos que melloran a eficiencia, optimizan o uso dos recursos, favorecen a sostenibilidade do sistema e impulsan o crecemento económico.