O programa Formación Dixital, posto en marcha pola Xunta de Galicia, a través da Amtega, a Axencia para a Modernización Tecnolóxica de Galicia, suma xa máis de 1.000 inscricións entre as mulleres galegas, que escolleron esta formación para certificar as súas competencias dixitais.

O obxetivo do programa destinado a máis de 45.000 persoas a partir dos 14 anos, é impulsar a alfabetización da sociedade galega no marco da Estratexia Galicia Dixital 2030, facilitando ferramentas para que os cidadáns e cidadás consigan a capacitación dixital necesaria para desenvolverse con seguridade.

O curso de nivel intermedio, ten as inscricións abertas a través da web www.formaciondixital.gal. A duración máxima é de 10 semanas, nas que se ofrecen contidos teóricos e actividades prácticas de forma sinxela e titorizada.

O CURSO DE FORMACIÓN DIXITAL

A formación ten unha duración máxima de 10 semanas nas que o alumno/a poderá avanzar o curso ao seu ritmo, a través dunha aprendizaxe guiada. Dispoñerá de sesións simultáneas de acompañamento con especialistas para resolver dificultades e retos. O curso desenvolverase dunha forma amena e atractiva mediante contidos formativos e actividades prácticas. Para a súa finalización os participantes terán que aprobar de maneira obrigatoria o 80% das actividades avaliativas.

Ademais dun test de autodiagnóstico e unha avaliación final, o curso traballa 5 bloques temáticos: Consulta e xestión da información dixital; Comunicación e colaboración; Creación de contidos dixitais, Benestar dixital: seguridade e protección e Contorna dixital e resolución de problemas.

A formación é totalmente gratuíta para o alumnado, xa que está financiado a través do Plan de Recuperación, Transformación e Resilencia (Next Generation da Unión Europea) e ademáis, servirá de base para preparar a Certificación Galega de Competencias Dixitais (ComDix).