Aspectos como os novos modelos de gobernanza dixital, a sustentabilidade do investimento en tecnoloxías da información ou a xeración, atracción e retención de talento caracterizarán o futuro inmediato das políticas de modernización tecnolóxica das Comunidades Autónomas españolas. Estas son algunhas das conclusións do primeiro Encontro de Equipos de Tecnoloxías da Información e Comunicacións (TIC) autonómicos que se celebrou esta semana en Madrid e no que participou a Xunta de Galicia.

No marco do Foro de Dixitalización das Comunidades Autónomas, os equipos de todos os territorios do Estado discutiron sobre o futuro deste ámbito tras o período expansivo que representou o Mecanismos de Recuperación e Resiliencia (MRR).

A Xunta estivo representada polo director da Axencia para a Modernización Tecnolóxica de Galicia, Julián Cerviño, ao que acompañaron os responsables da Xerencia e das áreas de Administración Dixital, Infraestruturas e Seguridade, Solucións Tecnolóxicas Sectoriais, Transformación Dixital da Facenda Pública e a Oficina de Apoio Estratéxico e Planificación.

Os expertos en dixitalización tamén abordaron aspectos como a xestión de provedores tecnolóxicos, a implantación de grandes sistemas de información, o funcionamento dos servizos de emerxencias ou o establecemento de convenios para a prestación de servizos de administración electrónica.

O encontro foi organizado pola Comunidade de Madrid e terá continuidade nos vindeiros anos, nos que corresponderá a outras Comunidades Autónomas organizalo.