A Consellería de Presidencia, Administracións Públicas e Xustiza porá en marcha a partir da semana que vén unha nova funcionalidade do Rexistro de convenios, que permitirá a calquera persoa que dispoña de certificado dixital solicitar telematicamente unha copia dun convenio ou certificación do asento do mesmo.

Este novo sistema, para a cal se contou co apoio técnico da Axencia para a Modernización Tecnolóxica de Galicia, enmarcase dentro da aposta da Xunta de Galicia por axilizar e modernizar todos os procedementos administrativos, na busca dunha relación máis fluída e transparente entre a Administración autonómica e a cidadanía.

Ata agora, as certificacións sobre datos e as copias simples de convenios xa se podían tramitar, pero de xeito tradicional, mediante a presentación dunha instancia nun rexistro administrativo e a oportuna contestación á consulta mediante oficio, aportando a documentación solicitada. Ademais, na páxina web da Consellería de Presidencia só se podía acceder aos datos básicos dos convenios e a listados simples.

Solicitude telemática sen desprazamentos
A partir de agora, calquera cidadán que dispoña de certificado da Fábrica Nacional de Moneda e Timbre terá a posibilidade de solicitar telematicamente unha copia do texto completo dun convenio o un certificado da existencia do dito convenio, a través da páxina web da Consellería, onde se ubica o buscador de convenios (http://www.xunta.es/consulta-convenios). Deste xeito, evitáselle aos interesados os desprazamentos e que teña que personarse nun rexistro dunha administración pública e efectuar a solicitude en papel.

Co novo sistema, bastará con seleccionar o convenio en cuestión no buscador de convenios, acceder á ficha do mesmo e pulsar sobre a ligazón correspondente “certificado” ou “copia”. De xeito automático se lle solicita ao cidadán a súa identificación contida no seu certificado dixital, a motivación da súa solicitude e un enderezo de correo electrónico no que recibirá a documentación solicitada.

A solicitude levará parella unha entrada electrónica no Rexistro Telemático da Xunta de Galicia, de xeito que a petición ten un tratamento análogo ao dunha presentación presencial en papel. O Rexistro de Convenios estudará a solicitude e validará, se procede, o envío da documentación ao solicitante.

A remisión da documentación aos administrados ten lugar a través do rexistro telemático de saída e mediante correo electrónico, ao enderezo que previamente consignaron ao facer a solicitude, xunto cos seus datos persoais contidos no seu certificado dixital. En ámbalas dúas opcións o solicitante recibirá un oficio de remisión e un certificado ou copia simple do convenio, segundo a opción exercida na súa solicitude.

Código de Validación Electrónica
Doutra banda, tamén está en marcha a posibilidade de que os cidadáns poidan comprobar a autenticidade do código Código de Validación Electrónica (CVE) que aparece no documento asinado electronicamente polo Rexistro de convenios. Poden facelo na páxina web: www.xunta.es/cve.

O Rexistro de convenios da Xunta de Galicia é competencia da Consellería de Presidencia, Administracións Públicas e Xustiza, concretamente da súa Dirección Xeral de Relacións Institucionais e Parlamentarias. A día de hoxe dispón de 29.599 convenios rexistrados desde a súa posta en marcha no ano 2002.