A Axencia para a Modernización Tecnolóxica de Galicia (Amtega), en colaboración coa Vicepresidencia da Xunta, vén de completar a dixitalización da oficina de Rexistro na Delegación da Xunta en Ourense. Esta iniciativa, que comezou o pasado ano no Rexistro Xeral en Santiago, continuará estendéndose de xeito progresivo ata chegar ás 533 oficinas da administración autonómica e das entidades locais que integran o Sistema Único de Rexistro.

Os documentos que os cidadáns entreguen en calquera destas oficinas de Rexistro dixitais, serán dixitalizados e compulsados electrónicamente e enviados de xeito inmediato ao órgano de xestión correspondente. Deste xeito, elimínanse os tempos de espera que implica o traslado físico da documentación entre o rexistro e o departamento que se ocupa dese trámite así como o uso do papel en todo o proceso.

Esa documentación en formato electrónico conforma o expediente administrativo dixital, que se almacena no Arquivo Dixital de Galicia e que, proximamente, estará dispoñible para o usuario a través da Carpeta do Cidadán. Neste espazo, accesible na sede electrónica da Xunta, os cidadáns poderán consultar online a situación do seu expediente administrativo.

O Arquivo Dixital de Galicia, situado no Centro de Proceso de Datos do Gaiás, é unha infraestrutura tecnolóxica chave no proceso de transformación da Administración que permite xestionar e conservar, con todas as garantías de seguridade e dispoñibilidade, a documentación dixital durante todo o ciclo de vida administrativa. Xa están integrados neste Arquivo 100 procedementos administrativos cuxa xestión é integramente electrónica, unha cifra que se irá incrementando progresivamente.

Plan de Administración e Goberno Dixital 2020

A dixitalización dos Rexistros é unha das actuacións do Plan de Administración e Goberno Dixital 2020, que busca culminar o traballo realizado nos últimos cinco anos en materia de administración electrónica e conseguir unha Administración que funcione integramente de xeito dixital, o que posibilitará un aforro anual de 41 millóns de euros no 2020. Estes avances dan resposta tamén as esixencias da entrada en vigor da Lei 39/2015 que busca consolidar unha administración dixital.

No último ano a Xunta avanzou en diferentes liñas do Plan coa culminación do Arquivo Dixital, incrementando os servizos da sede electrónica, que son xa o 72% do total; simplificando o seu acceso coa posta en marcha do servizo Chave365; cos avances da Plataforma de Interoperabilidade Pasaxe!, que evita a presentación de 40 certificados ou coa posta en marcha do sistema de notificacións electrónicas.