O salto cuántico: a viaxe da computación cuántica do laboratorio á industria
Como será o impacto da computación cuántica na industria? Nesta sesión realizarase unha breve introdución á historia das tecnoloxías cuánticas e aos fundamentos da mecánica cuántica que permiten desenvolver novas formas de computación diferentes das convencionais.
Ademais, ofrecerase unha panorámica das diferentes tecnoloxías empregadas para construír computadores cuánticos e dos principais actores que apostan por cada unha delas.
Finalmente, abordaranse as aplicacións da computación cuántica en distintos sectores industriais, tomando como referencia algúns dos traballos que se están desenvolvendo actualmente en ITG.
Programa
- Revolucións cuánticas
- Introdución á mecánica cuántica e á súa aplicación á computación
- Como construír un computador cuántico?
- Aplicacións industriais
- Computación cuántica en ITG
Sobre ITG
ITG é un centro tecnolóxico privado que, desde 1991, impulsa a competitividade empresarial mediante tecnoloxía, innovación e I+D.
O centro conta con capacidades avanzadas en ámbitos como a intelixencia artificial, a enerxía, a mobilidade non tripulada e a computación cuántica. Neste último ámbito, ITG é Centro de Excelencia Cervera desde 2023 e participa en dous proxectos estratéxicos: ARQA, orientado á aplicación da computación cuántica na empresa, e ARQADE, centrado na computación cuántica accesible e dual para Defensa e sectores estratéxicos.
Impartido por
Martín Ottavianelli é enxeñeiro eléctrico pola Universidade da República, Uruguai. Desenvolveu a súa traxectoria profesional no sector tecnolóxico, liderando equipos de innovación e implementando solucións de software para comunicación omnicanal e fintech.
Tras trasladarse a Galicia, cursou o Máster en Ciencia e Tecnoloxías de Información Cuántica da Universidade da Coruña e incorporouse ao grupo de computación cuántica de ITG. Actualmente investiga a aplicación de redes tensoriais á aprendizaxe automática.
Para quen?
PEMEs de ámbito civil e dual, así como empresas dos sectores de seguridade e defensa, interesadas en incorporar computación cuántica accesible e tecnoloxías cuánticas para abordar problemas complexos e mellorar as súas capacidades tecnolóxicas e operativas.
