Opendata - Abert@s
Abert@s é o portal de acceso aos datos públicos da Xunta de Galicia en formato reutilizable.
Os conxuntos de datos expostos ofrécense baixo licenzas de propiedade abertas, que permiten a súa redistribución, reutilización e aproveitamento con fins comerciais.
Os principais obxectivos do portal son:
Xerar valor e riqueza, obtendo produtos derivados dos datos que terceiros poidan crear.
Fomentar a transparencia, reutilizando os datos para analizar e avaliar a xestión pública.
Fomentar a interoperabilidade entre administracións, creando servizos que utilicen datos de diferentes administracións.
A iniciativa Abert@s persegue que determinados datos e informacións pertencentes ao sector público de Galicia sexan accesibles e estean dispoñibles para toda a cidadanía, sen restricións técnicas nin legais.
Abert@s pretende definir e pór en marcha unha estratexia xeral que permita mellorar o acceso á información pública, facilitando a reutilización da información por parte da cidadanía, das empresas e dos propios órganos internos.
Ter acceso aos datos da Administración garante a transparencia, dado que estes proceden directamente de fontes oficiais. Tamén se fomenta a eficiencia e a igualdade de oportunidades, xa que a cidadanía e as empresas poden crear servizos que resolvan as súas necesidades en colaboración coa Administración e acceder aos datos en igualdade de condicións.
Así, a Xunta de Galicia súmase a esta iniciativa na que xa están inmersas outras administracións públicas de todo o mundo, dando un paso máis por cumprir os seus obxectivos de implantar e difundir a Administración electrónica.
Para máis información visite o portal no enderezo http://abertos.xunta.es.
