A Xunta de Galicia publicou esta semana no seu portal Abert@s, http://abertos.xunta.es, os resultados definitivos das eleccións ao Parlamento galego do pasado 21 de outubro. Así as empresas e cidadáns que o desexen poden acceder a esta información en formatos abertos, o que lles permite reutilizalos e crear posibles aplicacións e prestacións.

Ao igual que os datos publicados en setembro sobre os comicios de 2009 e 2005, a información está dispoñible en dous ficheiros, un que agrupa os resultados electorais por concellos e outro que mostra a súa distribución por mesas electorais. A información dispoñible inclúe os datos do censo de electores, os indicadores de voto, abstención e os votos acadados por cada formación política que presentou candidatura.

Deste xeito dáselle continuidade á publicación de resultados electorais en Abert@s, despois de que no pasado mes de setembro se incorporaran ao portal os datos das eleccións galegas de 2009 e 2005 e que que rexistraron máis de 1.700 descargas ata hoxe. Ademais, esta información foi reutilizada pola empresa galega do sector TIC, Bahía Software, e  polo xornal El Correo Gallego para crear a aplicación Eleccións Galicia, que permite consultar os resultados dos procesos de eleccións ao Parlamento de 2005 e 2009 e obter, en tempo real, o avance do escrutinio de futuras xornadas electorais (como aconteceu cos avances do pasado 21 de outubro).

Coa apertura destes datos e a súa posta a disposición en formatos reutilizables, a Xunta de Galicia dá un paso máis no cumprimento dos principios de goberno aberto cos que se puxo en marcha, o pasado mes de marzo, esta iniciativa Open Data e que se basean na transparencia e na promocion da reutilización da información do sector público.

Materia prima para novas aplicacións e servizos
No portal Abert@s, publicase información de interese público da Administración galega e dos seus organismos de gran valor pola súa fiabilidade e calidade pero que non estaban adaptados para ser empregados por terceiros ou ben dispersos. Actualmente Abert@s ten publicados máis de 250 conxuntos de datos.

Os datos están dispoñibles en formatos estándar, abertos e interoperables, en liña coa promoción difusión e fomento da utilización de tecnoloxías baseadas en software libre e de fontes abertas que está a impulsar a Xunta a través do Plan Floss.

Esta iniciativa de Open Data supón elemento xerador de emprego e riqueza ao abrir a posibilidade de novas oportunidades de negocio para emprendedores que poden crear novas aplicacións e prestacións en base a esta información.

Ademais, esta información é especialmente relevante para o sector infomediario, isto é a para a industria de contidos dixitais que atopará materia prima para crear novos produtos e servizos e aplicacións de valor engadido.