Unha guía editada polo Instituto de Seguridade e Saúde Laboral (Issga) en colaboración coa Asociación Provincial de Industriais Electricistas e de Telecomunicacións da Coruña (Asinec) recolle un decálogo de boas prácticas para evitar riscos neste sector e asegurar unha actividade laboral máis segura.

Os contidos da publicación son eminentemente prácticos na análise dos riscos e danos derivados do contacto coa electricidade na práctica da actividade laboral. A guía recompila os conceptos e medidas preventivas e ofrece pautas de actuación en situacións de emerxencia.

Así o sinalou a directora do Issga, Adela Quinzá-Torroja, no acto de presentación da publicación, á que asistiron representantes de entidades e asociacións profesionais do sector.

A Asociación Provincial de Industriais Electricistas e de Telecomunicacións da Coruña encargarase de distribuír esta publicación entre as 350 empresas vinculadas a ela, que dan traballo a unhas 3.000 persoas.

Tamén se repartirá entre as asociacións que forman parte da federación nacional, dado que é a primeira publicación que reúne os distintos conceptos relacionados con este eido de actividade e as recomendacións prácticas para facer máis segura a actividade laboral dos seus profesionais.