En Galicia, un 80% das empresas utiliza algunha tipoloxía de software de código aberto, 5 puntos máis que no ano 2011 (75,2%), segundo recolle un informe do Observatorio Nacional do Software de Fontes Abertas do CENATIC sobre os anos 2011 e 2012.

O incremento rexístrase nos tres sectores de actividade analizados por CENATIC, como é o caso do sector servizos, que experimenta un crecemento interanual de 7,9 puntos (75,6% das empresas no 2011 fronte ao 83,5% de 2012); no sector da construción (81,1% no 2011 e 82,4% no 2012) e no da industria (71% no 2011 e 73,2% no 2012).

Este incremento débese en boa media a un maior uso dos navegadores web de software libre, utilizados polo 75,1% das empresas con máis de 10 traballadores no ano 2012, pero tamén ao uso de aplicacións ofimáticas (56,8%), de sistemas operativos (32,2%) e doutras aplicacións de uso libre.

Os datos achegados polo Observatorio do Centro Nacional de Referencia do Sofware Libre (CENATIC) confirman que as empresas de maior tamaño apostan polo software libre, como estratexia  para mellorar a produtividade e reducir custos. Neste senso, no conxunto do Estado, un 82,3% das empresas con máis de 250 traballadores utilizaron esta tipoloxía de software durante o ano 2011.

Microempresas

No caso das empresas de menos de 10 empregados só o 45,5% recoñece que utilizou algunha tipoloxía de software de código aberto durante o ano 2011. As ferramentas informáticas máis utilizadas polas microempresas galegas foron os navegadores de Internet (36%) e as aplicacións ofimáticas (29,8%), como é o caso de Mozilla Firefox e Open Office respectivamente. Esta preferencia tamén se observa noutras Comunidades Autónomas e nos diferentes sectores de actividade, especialmente no sector TIC.

Pode consultarse a serie de datos completa na seguinte ligazón:
http://observatorio.cenatic.es/index.php?option=com_content&view=article...