O presidente da Xunta, Alberto Núñez Feijóo, e o presidente de Telefónica, César Alierta, asinaron esta mañá a adhesión do operador ao Pacto Dixital de Galicia, un acordo no que tanto o Goberno galego como as empresas asinantes asumen un decálogo de compromisos para atraer investimento a Galicia, favorecer a internacionalización das pemes galegas e lograr a colaboración activa entre as grandes e pequenas empresas para conseguir o crecemento do sector.

Telefónica súmase así ás empresas tecnolóxicas HP, Indra, Everis, Tecnocom, Iecisa, Satec, Televés, R, Altia, Coremain e o Clúster TIC Galicia, que o pasado mes de xullo subscribiron este acordo co Goberno galego, o primeiro deste tipo que se realiza en España.

A primeira medida que Telefónica adoptará no marco do Pacto é a posta en marcha dun Programa de Apoio ao Emprendemento TIC en Galicia co obxectivo de detectar iniciativas de proxectos tecnolóxicos con alto potencial de crecemento, con impacto a longo prazo na Comunidade e que, á súa vez, permitan o descubrimento de talento e o fortalecemento do tecido empresarial galego.

Centro de Emprendemento TIC
A primeira fase do programa contempla a creación dun Centro de Emprendemento TIC, que ocupará unha superficie de 420 metros cadrados nas instalacións da Cidade da Cultura. O centro ofrecerá a 60 emprendedores do eido tecnolóxico, na súa etapa inicial, un espazo para desenvolver os seus proxectos, recibir asesoramento, orientación e formación, mediante as actividades permanentes que se celebrarán no propio centro e a través do persoal de apoio.

A Xunta e Telefónica asinarán un convenio antes do remate de 2013 para formalizar a creación do centro, que entrará en funcionamento na primavera de 2014.

A segunda fase do proxecto centrarase, exclusivamente, na constitución e desenvolvemento dunha aceleradora de proxectos tecnolóxicos de alto potencial en Galicia, con capacidade para impulsar ata 8 iniciativas TIC. Para apoialas, Telefónica desenvolverá un programa no que empregará a experiencia e os recursos da súa iniciativa Wayra, coa que a compañía está a potenciar a innovación e a detectar novos talentos, así como a apoiar a emprendedores e start-ups en Latinoamérica e Europa no eido das TIC.

Compromisos do Pacto Tecnolóxico
Coa adhesión de Telefónica son xa 11 as empresas tecnolóxicas que plasman nun acordo co Goberno galego o seu compromiso para investir en Galicia e contribuír a converter a Comunidade en polo tecnolóxico de referencia.

Por iso, o Pacto establece, entre os compromisos das empresas asinantes, o de colaborar activamente na captación de financiamento en programas como o Horizonte 2020 para o desenvolvemento de novas liñas de negocio e novos produtos en Galicia. Tamén comprometen a apostar polo rural galego coa extensión de tecnoloxía de nova xeración; a apoiar aos emprendedores dixitais de Galicia e a participar activamente como mecenas dixitais impulsando actuacións que capaciten a cidadanía. Ademais, nos compromisos do sector figura a vontade de garantir, mediante un programa de bolsas, a incorporación ao mercado laboral de universitarios e estudantes de Formación Profesional Obrigratoria do eido tecnolóxico.

O Goberno galego se compromete a elaborar a Lei de desenvolvemento dixital para a transformación de Galicia cara a unha economía baseada no coñecemento. Ademais, garante que capacitará os cidadáns para que poidan integrarse no contorno dixital e que impulsará grandes proxectos tractores de innovación tecnolóxica nos sectores produtivos estratéxicos para Galicia, apostando por convocatorias de financiamento de grandes proxectos que permitirán captar fondos europeos.