Rogelio Martínez participou na presentación da páxina web entretiendas.com do Centro Comercial Aberto
O goberno galego financiou este proxecto a través do IMIT ( iniciativas de modernización e innovación tecnolóxica)
O Delegado Territorial asegurou, na súa intervención, que grazas a esta nova páxina web gañan os comerciantes porque se mellora a competitividade dos seus comercios e gañan os usuarios porque teñen acceso a produtos de calidade doutras temporadas a prezos moi ventaxosos
O Delegado Territorial da Xunta en Ourense, Rogelio Martínez, participou, esta mañá, na presentación da páxina web, entretiendas.com, posta en marcha polo centro comercial aberto de Ourense.
Entretiendas.com é unha canle de venda on-line para produtos doutras tempadas a prezos moi ventaxosos para o cliente de ata un 70% de desconto. Na actualidade máis de 250 establecementos ourensáns de diferentes sectores empresariais, están asociados a Ourense Centro e grazas a este novo portal atopan unha nova canle de distribución no que se conxuga a tradición e a innovación solucionando a acumulación de excedentes nos almacéns.
Martínez, na súa intervención, amosou o compromiso do goberno galego con este proxecto, de feito, o financiamento do proxecto correu a cargo do IMIT ( iniciativas de modernización e innovación tecnolóxica).
“Sen dúbida este é un proxecto moi interesante e estou seguro que acadará os éxitos que merece. O comercio tradicional ten que renovarse e ser competitivo e as novas tecnoloxías son fundamentais para consegui-lo. Grazas a esta nova páxina web gañan os comerciantes porque se mellora a competitividade dos seus comercios e gañan os usuarios porque teñen acceso a produtos de calidade doutras temporadas a prezos moi ventaxosos”, asegurou o Delegado Territorial.
Martínez referiuse ademais a nova lei do comercio recentemente aprobada. “Nesta nova lei, na que a revitalización do comercio urbano ten un papel fundamental, recoñécese as figuras dos centros comerciais abertos como unha alternativa de atención personalizada e de proximidade aos consumidores, e como sistema de dinamización dos cascos urbanos das nosas vilas e cidades”, sinalou o Delegado Territorial. A normativa contempla tamén a definición dos outlets ou centros de fabricantes, establece unha normativa clara e actualizada en canto ás promocións, ao tempo que se regulariza a situación das feiras de oportunidades, en resposta ás demandas do sector.
Durante a súa intervención, Rogelio Martínez, explicou que a nova lei permite deseñar “novas liñas de actuacións que contribúen á modernización e ao desenvolvemento integral do sector comercial en Galicia, fomentando a incorporación da innovación e das novas tecnoloxías, mellorando a capacitación profesional e incrementando a competitividade do comercio galego”.
Neste sentido, Martínez lembrou que a Consellería de Economía e Industria destinou 3,33 millóns de euros á dinamización de Centros Comerciais Abertos das catro provincias galegas, a través das liñas de axuda específicas enmarcadas dentro do Plan Ágora – Agora re-Comercia, dotado con case 130 millóns de euros.