O presidente da Xunta de Galicia, Alberto Núñez Feijóo, avanzou hoxe a renovación do equipamento de alta tecnoloxía para o diagnóstico pola imaxe e a medicina nuclear de todos os hospitais públicos de Galicia. En concreto, os equipos que se renoven serán os de tomografía computerizada, resonancia magnética, mamógrafos, salas de raios dixitais, radioloxía vascular e neurorradioloxía —dentro do diagnóstico pola imaxe— e de PET e gammacámaras —destinados a medicina nuclear—.

O investimento, de 48,4 millóns de euros, permitirá a renovación de 68 equipos dos hospitais públicos de Galicia. Garantirá tamén que a maquinaria estea sempre actualizada nos vindeiros oito anos. Entre os primeiros servizos que se equiparán estará o de medicina nuclear do Hospital Lucus Augusti. Ademais, adquirirase o TAC comprometido para o Hospital comarcal do Barco e todo o equipamento do Hospital público Álvaro Cunqueiro de Vigo.

Durante a súa intervención, o xefe do Executivo galego resaltou que esta iniciativa significa un paso máis dentro do plan de renovación da alta tecnoloxía sanitaria do Servizo Galego de Saúde, un “macrocontrato” dun valor total de 88 millóns de euros. “Hai unhas semanas adxudicamos do primeiro lote, que suporá a renovación de dez aceleradores de radioterapia, que en Lugo están xa comezando o seu período de probas —explicou—. Despois, renovamos os equipos de intervencionismo guiado por imaxe en cardioloxía, os equipos necesarios para a remodelación dos servizos de hemodinámica”.

Con este terceiro lote, o Sergas ampliará aos eidos do diagnóstico por imaxe e medicina nuclear a súa aposta por “ter unha excelente tecnoloxía”, segundo subliñou Feijóo. “Esta renovación permitirá mellorar a calidade diagnóstica e asistencial, dispoñer dun novo equipamento e atender de forma máis eficiente a demanda de probas diagnósticas e de procedementos terapéuticos, algo que é posible grazas á mellor tecnoloxía sanitaria que existe no mundo”, concluíu.