O secretario xeral de Medios, Alfonso Cabaleiro Durán, destacou hoxe o esforzo que está a realizar o Goberno galego, conxuntamente co Goberno central, para que o proceso de apagado analóxico na comunidade, que empeza o vindeiro luns, 18 de xaneiro, sexa unha realidade. Nunha comparecencia ante os medios de comunicación, na que tamén participaron o subdirector xeral de Enxeñaría e Planificación de Telecomunicación, Radio, Televisión e Multimedia da Xunta, Ignacio Otero, e o director técnico de Retegal, Joaquín Alonso, o secretario xeral de Medios explicou polo miúdo todas as actuacións e xestións realizadas pola Xunta para a implantación da televisión dixital terrestre na nosa comunidade e resaltou o esforzo técnico realizado e a revolución tecnolóxica que suporá a implantación da TDT en Galicia.

Alfonso Cabaleiro resaltou que o vindeiro luns comezará a aplicarse en Galicia o apagado analóxico das fases I (Ourense- Leste e Santiago) e II (Meda e Ares), un proceso que, dixo, beneficiará, fundamentalmente, a concellos das provincias da Coruña e Ourense, aínda que tamén a algúns municipios das provincias de Lugo e Pontevedra.

Segundo sinalou o secretario xeral de Medios este primeiro proceso de apagado analóxico das fases I e II farase de xeito gradual, desde o vindeiro 18 de xaneiro ata o 1 de febreiro (xúntase cadro explicativo no que se detallan as datas de apagamento nas distintas áreas técnicas das fases I e II). Máis adiante, incidiu Cabaleiro, continuarase co apagado das zonas do Páramo e Domaio, correspondentes á fase III, que beneficiará aos concellos de Pontevedra e Lugo, aínda que tamén a algúns municipios das provincias da Coruña e Pontevedra. O obxectivo, lembrou o secretario xeral de Medios, é que o próximo 3 de abril estea totalmente rematado este proceso de apagado analóxico.

Intensificación do servizo de atención telefónica ao cidadán  
Na rolda de prensa que se celebrou esta mañá, Alfonso Cabaleiro Durán subliñou, ademais, que o Goberno galego intensificou o servizo de atención telefónica sobre a TDT co obxectivo de dar unha resposta máis áxil ás posibles dúbidas que lle poidan xurdir sobre este proceso aos cidadáns. Así, incidiu Cabaleiro, a Xunta ampliou o servizo de información cidadá, a través do 012, para atender todas as consultas relativas ao proceso de apagado analóxico. Segundo destacou, este novo número vense sumar ao xa existente da Oficina Técnica da TDT, con varias liñas, polo que todos aqueles cidadáns que requiran información precisa sobre este asunto poderán facelo tanto a través do 012 como do 981 572 154. Ademais, poderán obter máis información a través da páxina web www.tdtgalicia.es ou do teléfono de atención ao usuario de Retegal, que é o 901 333 111.

Información na Cámara galega 
O secretario xeral de Medios tamén lembrou que xa solicitou a comparecencia urxente na Comisión 1ª Institucional, da Administración Xeral, Xustiza e Interior do Parlamento galego para informar sobre este proceso de apagado analóxico que se inicia o vindeiro luns, unha vez, dixo, que a Xunta de Galicia e o Goberno central teñen ultimado as datas do apagamento analóxico. Alfonso Cabaleiro apuntou que esta será a súa segunda comparecencia na Cámara para explicar o proceso de implantación da TDT, logo da xa realizada no pasado mes de xuño.

Así mesmo, lembrou os distintos contactos mantidos ao longo de todos estes meses con alcaldes e distintos grupos políticos para informalos de todo este proceso.

Máis canles de televisión, mellor calidade, novos servizos e mellor recepción  
A implantación da televisión dixital terrestre representa novas vantaxes para os usuarios posto que permite, entre outros, recibir máis canles de televisión, unha mellor calidade, ofrece novos servizos e permite a recepción móbil e portátil.

Así, a dixitalización da televisión permite usar de forma máis eficiente o espectro radioeléctrico, incrementando o número de canles dispoñibles. O resultado máis visible para os espectadores é un incremento na oferta do número de canles. Por iso, na maioría das zonas do visionado actual de 6 a 8 canles de televisión pásase a máis de 25 canles.

De igual xeito, a transmisión dixital elimina ruídos, interferencias e dobre imaxe. É dicir, a TDT recíbese con maior calidade de imaxe, eliminando o efecto néboa ou dobre imaxe dos nosos televisores. Así mesmo, pódense ofrecer contidos con formato de imaxe panorámico (16/9) xa aceptados en moitos dos novos televisores do mercado, múltiples subtítulos e unha mellor calidade de son (parecida á que proporciona un CD), con efectos surround multicanle e multilingüe. Os espectadores poderán gozar da espectacularidade do cine ou eventos deportivos en calidade DVD a través do sinal da antena.

A dixitalización do sinal e o mellor aproveitamento do ancho de banda permite que as televisións ofrezan novas funcionalidades que van máis aló dos simples contidos audiovisuais e que reforzan a experiencia do telespectador. Estes servizos avanzados son: a guía electrónica de programas (EPG), o teletexto dixital cunha contorna moito máis visual e amigable, servizos interactivos (xogos, votacións, chats, etc), emisión de canles de radio a través da televisión, posibilidade nun futuro de acceder a contidos premium mediante a modalidade de pago por visión, visión multicámara en eventos deportivos, acceso a Internet, etc. Desta forma os telespectadores deixan de ser un elemento pasivo da televisión para converterse en parte activa da mesma.

As emisións de televisión dixital terrestre, a diferenza doutros sistemas de televisión dixital (como satélite ou cable), permiten a recepción portátil e móbil. A televisión dixital pode ser recibida, sempre que estea situado dentro da zona de cobertura, por un aparello de televisión cunha simple antena telescópica (similar á dunha radio), esta recepción pode ser tanto estática como en movemento (como, por exemplo, en medios de transporte talles como un autobús, un tren ou ata coches particulares).

Ademais, existe a posibilidade de que nun formato modificado da TDT se permita ver os seus contidos a través de PDAs, teléfonos móbiles, videoconsolas portátiles, etc.

A continuación xúntase un cadro explicativo no que se detallan as datas de apagamento nas distintas áreas técnicas das fases I e II:

Esta relación de datas de apagamento nos distintos centros pertencentes ás fases I e II podería sufrir leves modificacións, das que, de ser o caso, se informará debidamente.