O director xeral do Igape, Javier Aguilera, mantivo hoxe un encontro con emprendedores participantes no programa C-Teams, destinado a impulsar a mellora continuada das empresas de base tecnolóxica para desenvolver novos produtos ou servizos.

Aguilera Navarro felicitou aos emprendedores tecnolóxicos que participaron no programa pola súa decisión de acollerse a esta iniciativa coa que se aposta pola mellora continuada na procura de desenvolver novos produtos ou servizos que garantan a competitividade futura das súas empresas. O director do Igape tivo así a oportunidade de coñecer de xeito directo os resultados e melloras acadados por cada unha das empresas participantes.

Ao mesmo tempo, Aguilera destacou a futura Lei de Emprendemento de Galicia, que garantirá un marco estable para achegar unha protección integral aos emprendedores galegos, así como a achega dos servizos e dos apoios adecuados para cada fase de desenvolvemento dos novos proxectos empresariais.

O programa C-Teams ten como obxectivo facilitar a consolidación e impulsar a mellora da competitividade en empresas de base tecnolóxica ou de coñecemento de recente creación. Basease na definición dunha carteira de proxectos de mellora e na execución dun proxecto en forma dunha nova proposta de produto ou servizo innovador.

A iniciativa céntrase en fomentar a cultura da mellora continuada, conxugando conceptos como estratexia, innovación, mercado, produtos e servizos, valor e riscos, contando con formación práctica en novas metodoloxías para que os empresarios participantes podan incorporar novas habilidades de xestión, e con asesoría experta.