O presidente da Xunta, Alberto Núñez Feijóo, subliñou hoxe que a estensión do Proxecto Abalar permitirá que o vindeiro curso se duplique o número de alumnos e de aulas que empregan ferramentas dixitais. Así o dixo o xefe do Goberno galego na rolda de prensa posterior ao Consello da Xunta, que esta mañá deu luz verde ao acordo para ampliar o programa destinado a aplicar as novas tecnoloxías nas aulas.

Na súa comparecencia ante os medios, o titular da Xunta remarcou que no curso 2011-2012 o Proxecto Abalar seguirá funcionando nos cursos de quinto de Primaria e primeiro da ESO e se ampliará a sexto de Primaria e segundo da ESO. Explicou que Abalar chegará a “31.500 alumnos”, ao tempo que se “duplicará o número de aulas con contidos dixitais”.

“O próximo curso chegaremos ao 15% de todos os alumnos de primaria e secundaria que estudiarán con contidos dixitais a través do ordenador financiado con fondos públicos da Xunta de Galicia”, salientou o presidente galego, quen engadiu que, en total, as aulas dixitais que funcionarán o vindeiro curso son 1.500, o dobre que no actual.