Durante 2012 realizáronse un total de 2.449 videoconferencias nos órganos xudiciais galegos, que permitiron un aforro estimado, só en desprazamentos, superior aos 260.000 euros.  A Axencia para a Modernización Tecnolóxica de Galicia (Amtega), rematou o ano pasado a posta en marcha desta rede ao finalizar o despregamento de 22 novos terminais de sala.

Actualmente, a Administración da Xustiza en Galicia conta cunha rede de  videonconferencia dotada de  55 equipos de sala que dan servizo ao o 100% das salas consideradas preferentes (menores, violencia de xénero, penal, vixilancia penitenciaria).

Duplicaranse  o postos de videoconferencia persoal

Ademais, están instalados 310 postos de videoconferencia persoal  nos equipos dos usuarios das Fiscalías, o IMELGA e dos xuíces e maxistrados das vilas galegas e está previsto amplialas a 600. O  uso desta aplicación, que permite a participación dos usuarios de xeito remoto, facilítase o traballo colaborativo, xa que permite compartir documentación e participar en reunións evitando os desprazamentos.

Usos e vantaxes

A videoconferencia na administración de xustiza emprégase nas declaracións e interrogatorios de procesados, testemuñas e peritos, tanto en fase de instrución penal como na celebración de vistas en todos as ordes xurisdicionais. Adoita empregarse tamén nas entrevistas dos xuíces de Vixilancia Penitenciaria aos reclusos e nas declaracións interrogatorios e entrevistas a menores en centros de internamento polas Fiscalías ou Xulgados de Menores.

Entre outras vantaxes, a videoconferencia  contribúe a axilizar a actividade xudicial, permite unha maior seguridade ao evitarse traslados nos casos de reclusos e presos preventivos aos órganos xurisdicionais,  reduce os desprazamentos de peritos, testemuñas e partes  e facilita unha mellor organización do traballo nos órganos xudiciais ao evitar aprazamentos por motivos de distancia física. Ademais, permite reducir custes por dietas, gastos de custodia e investimento en vehículos.

Plan Senda

A posta en marcha da rede de videoconferencia nos órganos xudiciais é unha das actuacións previstas no marco do Plan Senda da Xunta para integrar as TIC na Xustiza, que   contou cun investimento no período 2009-2012 de  13,7 millóns de euros.

Entre os obxectivos acadados o pasado ano grazas ao Plan está finalización da implantación do sistema Lexnet en todos os órganos xudiciais de da Comunidade, que rexistraron  2.551.458 notificacións electrónicas. Para empregar este sistema a Xunta completou en 2012 o proceso de acreditación dixital dos empregados públicos da Administración da Xustiza  a través do Programa Kronos coa emisión de 2.551 tarxetas criptográficas que permiten o acceso a Lexnet e a sinatura dixital.

Ente as liñas de actuación para 2013 destaca a posta en marcha dun Plan para a renovación dos sistemas de gravación de vistas en sedes xudiciais no marco do convenio Ius+Red asinado entre a Xunta de Galicia, o Ministerio de Justicia e a entidade pública empresarial Red.