O Centro Demostrador TIC de Galicia, acollerá o vindeiro xoves 31 de maio a Xornada "Boas Prácticas, Oportunidades e Estratexias para crecer coas TIC". O obxectivo da xornada é facer balance do seu primeiro ano de funcionamento e ademais achegar ás empresas galegas tendencias tecnolóxicas que posibiliten a modernización do seu negocio, a mellora do seu posicionamento na economía galega, así como a apertura a novos mercados.

A xornada, que se celebrará en horario de 9:00h a 14:00h, comezará cunha visita guiada ao Centro Demostrador. Posteriormente realizarase a apertura institucional por parte de representantes de red.es e a Xunta de Galicia para dar paso a unha serie de relatorios de carácter eminentemente práctico.

Durante as intervencións diversos expertos expoñerán a aplicación e o uso eficaz das últimas tendencias tecnolóxicas co obxectivo de potenciar a competitividade e rentabilidade empresarial. Así o marco de relatorios comezará con "Software Libre como ferramenta de eficiencia e competitividade para a Peme", seguido da ponencia "Cloud Computing. Aproveitando os beneficios da nube", para rematar con "Social Media. O teu negocio conectado". Todos os relatorios contarán coa participación dun empresario galego que aporte a súa exitosa experiencia no uso das TIC.

A xornada vai dirixida aos autónomos e profesionais de empresas da nosa comunidade e asistencia é de balde, condicionada ao aforo do local e previa inscrición en liña a través do portal web do Centro Demostrador TIC (http://cdtic.xunta.es/node/384).

Balance do Centro Demostrador TIC
Desde a posta en marcha do Centro Demostrador TIC, preto de 40 empresas TIC galegas presentaron as súas solucións tecnolóxicas no centro e máis de 350 profesionais se achegaron para participar nas actividades e coñecer as súas instalacións.

As actividades desenvolvidas tiveron na súa maioría un carácter transversal, dirixidas a todos os sectores produtivos de Galicia, aínda que se presentaron produtos dirixidos a sectores concretos como Agroalimentario, Téxtil, Metal ou Pedra.

Aínda que o 14,5% das empresas que asistiron pertencen aos sector TIC, tamén estiveron representados outros sectores como administración pública (7,1%), educación (6%), telecomunicacións (5,7 %), actividades profesionais científicas e técnicas (3%), alimentación e bebidas (2,7 %) e enerxía (2,7 %), entre outros.

Pola súa parte, o MapaTIC.gal, a ferramenta de referencia para o Centro Demostrador TIC de Galicia de cara a identificar provedores e solucións tecnolóxicas de Galicia alén de potenciais demandantes de tecnoloxía, segue a incrementar o número de rexistros contando na actualidade con 150 provedores tecnolóxicos e preto de 330 de solucións tecnolóxicas.

Centro Demostrador TIC de Galicia
O Centro Demostrador TIC de Galicia é froito dun convenio de colaboración entre a Xunta de Galicia e o Ministerio de Industria, Enerxía e Turismo, a través da entidade pública empresarial red.es.

Fondo Europeo de Desenvolvemento Rexional (FEDER)
Este proxecto púidose levar a cabo grazas ao cofinanciamento da Unión Europea a través do Fondo Europeo de Desenvolvemento Rexional (FEDER), o que permite contribuír a mellorar a cohesión social das rexións españolas mediante a corrección dos principais desequilibrios rexionais, a través da entidade pública empresarial red.es, que se encarga de fomentar o desenvolvemento do ámbito produtivo, o desenvolvemento tecnolóxico e a sociedade da información.