O Centro de Novas Tecnoloxías (CNTG) da Consellería de Traballo e Benestar e o Centro Nacional de Referencia de Aplicación das TIC baseadas en fontes abertas (CENATIC) colaborarán na potenciación de accións formativas que, no ámbito do software libre, realice o CNTG dentro do seus plans de formación.

Así se reflicte nun convenio de colaboración asinado entre a conselleira de Traballo e Benestar, Beatriz Mato, e o director xerente de CENATIC, Miguel Jaque, cunha vixencia de dous anos. Estas accións permitirán ao alumnado a obtención de certificacións profesionais encadradas no modelo de capacitación certificado do CENATIC.

O acordo asinado supón unha mellora cualitativa e cuantitativa dos beneficios que o CNTG achega aos profesionais do sector TIC galego, pois estes, sexan ou non alumnos do centro e sen custo algún para eles, van ter a posibilidade de acreditar os seus coñecementos mediante un certificado profesional asociado a un sistema de ordenación do coñecemento implantado por CENATIC e diferente, polo tanto, dos que actualmente oferta o CNTG, baseados principalmente en currículos formativos definidos polos diferentes fabricantes tecnolóxicos do sector.

Entre outros apartados, a colaboración entre ambas partes implica o estudo e análise dos plans formativos do CNTG co obxecto de identificar aqueles puntos nos que CENATIC poida ofrecer melloras a través do seu programa de Capacitación Certificada e que permitan realizar actuacións de validación de certificados profesionais incluídos na oferta formativa do CNTG ou a realización de exames oficiais CENATIC nas instalacións do Centro de Novas Tecnoloxías e con carácter gratuíto para os interesados.

A firma do presente convenio por parte da Xunta de Galicia implica un novo impulso por parte da Consellería de Traballo e Benestar na acreditación e certificación daqueles profesionais TIC que desexen desenvolver a súa actividade no sector do software libre.