O Centro Demostrador TIC, que xestiona a Axencia para a Modernización Tecnolóxica de Galicia (Amtega), acollerá nas súas instalacións este xoves, 5 de marzo, a sesión “Managed File Transfer: métodos de transferencia de ficheiros por internet” (https://cdtic.xunta.es/mft-v-mann), que se desenvolverá en horario de 16.30 a 19.00 horas.

Na xornada explicarase en que consiste un Managed File Transfert, método utilizado na actualidade para o transporte seguro e supervisado de ficheiros a través de internet, que incorpora métodos como o SFTP e FTPS.

Esta sesión demostradora está especialmente deseñada para empresas de loxística, transportes, franquías, call centers, cadeas de tendas e empresas de informática. V-Mann será a empresa encargada da demostración, unha compañía tecnolóxica especializada no desenvolvemento de solucións para a comunicación de datos, web e apps.

Para participar nesta actividade cómpre inscribirse na web do CDTIC (https://cdtic.xunta.es/). A asistencia é de balde e hai prazas dispoñibles.

Centro Demostrador TIC
O CDTIC, promovido pola Axencia para a Modernización Tecnolóxica de Galicia, ten como obxectivo achegarlles a oferta de produtos tecnolóxicos ás empresas doutros sectores produtivos. O Centro constitúe un punto de encontro entre a oferta TIC e a demanda tecnolóxica do tecido empresarial galego.

Deste xeito, as empresas TIC poderán desenvolver solucións innovadoras adaptadas ás necesidades de mercado de empresas doutros sectores produtivos, que coñecerán os produtos TIC máis adecuados para optimizar os seus negocios e terán a oportunidade de trasladarlles demandas concretas ás empresas do ámbito tecnolóxico.

O Centro Demostrador TIC de Galicia é froito dun convenio de colaboración entre a Xunta de Galicia e o Ministerio de Industria, Enerxía e Turismo, a través de Red.es, e a súa misión é ofrecer un espazo de encontro entre a oferta e a demanda tecnolóxica.