A secretaria xeral de Modernización e Innovación Tecnolóxica, Mar Pereira, destacou hoxe a importancia da colaboración e o esforzo de todos os colectivos implicados no proceso de  modernización da Xustiza que está a desenvolver a Administración autonómica. Así o indicou durante a inauguración das II Xornadas de Informática Xudicial e Delitos Informáticos que organiza o Colexio Profesional de Enxeñaría Técnica en Informática de Galicia, en colaboración coa Secretaría Xeral.

Mar Pereira sinalou que para Xunta de Galicia, a Administración de xustiza constitúe unha área prioritaria de desenvolvemento e por iso se puxo en marcha o ano pasado o Plan Senda 2014, que establece a folla de ruta para implantar de xeito efectivo as TIC na Xustiza.

O plan, que conta cun orzamento de 34 millóns de euros, contempla a o fomento do uso das ferramentas informáticas así como actuacións de renovación do equipamento e a actualización dos sistemas de información. Ademais, está a impulsar a implantación de servizos en mobilidade para que os profesionais da Xustiza teñan ao seu alcance os medios que lles permitan realizar o seu traballo desde calquera lugar. Nesta liña de actuación encaixan a implantación de servizos de videoconferencia ou a dotación de dispositivos de conexión remota para fiscais e xuíces.

Mellora das infraestruturas e formación 
A responsable Modernización  afirmou que para acadar un aproveitamento beneficioso das TIC no proceso xudicial, se está a mellorar a dotación de infraestruturas tecnolóxicas como a renovación do equipamento informático  cunha antigüidade superior aos cinco anos que se completará entre xaneiro de febreiro de 2012. Nesta mesma liña de actuación instalaranse 22 equipos de videoconferencia e arredor de 100 equipos de gravación de vistas nos órganos xudiciais galegos, no marco do acordo Ius+Red asinado co Ministerio de Xustiza.

Outras das liñas de acción do Plan Senda é promover o emprego dos sistemas de información dixital e  fomentar o seu coñecemento cara o expediente electrónico xudicial. Neste sentido, a secretaria xeral destacou que no 2011 realizáronse máis de 600.000 notificacións telemáticas desde os 100 órganos xudiciais que dispoñen de Lexnet e que nos últimos 12 meses mais de 3.000 traballadores do ámbito xudicial públicos participaron en máis de 300 cursos de formación sobre o uso dos sistemas de xestión procesual.

Xornadas 
As “II Xornadas de Informática Xudicial e Delitos Informáticos”  xornadas que se celebran hoxe e mañá en Santiago de Compostela, inscríbese no convenio de colaboración subscrito entre  a Secretaría Xeral de Modernización e Innovación Tecnolóxica e a o Colexio Profesional de Enxeñaría Técnica en Informática para realizar accións formativas no eido das peritaxes xudiciais e técnicas probatorias.

As  Xornadas contan cun completo programa de relatorios e mesas redondas organizadas en dúas sesións. Na xornada de hoxe os relatorios corren a cargo do Maxistrado e Director do Servizo de Modernización e Organización Xudicial do Consello Xeral do Poder Xudicial, Joaquín Delgado Martín, e da Avogada e Socio Director de Razona Legaltech, Paloma Llaneza. A xornada completarase cunha mesa redonda titulada: “¿Estamos preparados para dar seguridade xurídica a un mundo xa dixital?”.

Durante a segunda xornada do ciclo, o sábado día 12, os relatorios correrán a cargo do xuíz da Audiencia Nacional, Eloy Velasco, da Fiscal Xeral en Criminalidade Informática, Elvira Tejada de la Fuente, e do inspector Xefe do grupo de Análise de Software da sección de Informática Forense da Policía Nacional, Jorge Martín García. A xornada completarase cunha mesa redonda titulada: “Retos da xustiza ante a nova realidade informática”.