A páxina web do Turismo de Galicia, www.turgalicia.es, foi visitada en 2010 por un total de 2.213.184 internautas de todo o mundo. Estes usuarios do sitio web do Turismo galego viron na súa navegación 15.850.743 páxinas o ano pasado.

Por países, os usuarios principais da web de Turgalicia, dependente da Consellería de Cultura e Turismo, procedían de España, 1.706.438, con 12.852.848 páxinas vistas. O resto de usuarios, 343.739, accederon á web do Turismo galego desde 97 países distintos. Logo de España, o meirande número de visitas corresponde aos Estados Unidos de América, Portugal, Francia, Alemaña, Italia, Reino Unido, Brasil, Arxentina, Suíza e México, por esta orde.

Por comunidades autónomas, a web do Turismo galego, sen ter en conta a propia Comunidade galega, ten o meirande número de usuarios en Madrid, con 396.808 sesións únicas e 3.052.527 páxinas vistas en 2010. A Madrid, séguenlle Cataluña, Andalucía, Castela e León, a Comunidade Valencia, Asturias, Euskadi, Castela A Mancha e Illas Baleares.

Nove idiomas

A páxina web de Turgalicia permite, entre outra información de interese, localizar todos os recursos turísticos de Galicia, así como a oferta de aloxamentos e restaurantes da Comunidade galega.

O sitio web do Turismo galego pódese consultar en nove idiomas distintos e permite descargar o material de promoción do Turismo de Galicia, ademais de acceder a outros servizos turísticos.

Por outra parte, na web de Turgalicia pódese reservar on-line aloxamento nas casas de Turismo Rural de Galicia adheridas á Central de Reservas de Turismo Rural.