Un total de cento trece persoas participan no concurso sobre Produción Audiovisual organizado pola Rede de Centros para a Modernización e Inclusión Tecnolóxica de Galicia (CeMIT), no marco do Plan de Dinamización 2012. O concurso ten como obxectivo recoñecer os mellores traballos desenvolvidos polos alumnos durante o curso sobre Produción Audiovisual que se desenvolveu dende o pasado mes de outubro nas aulas da Rede CeMIT.

Durante a actividade, que contou con 60 horas, os participantes viaxaron por todas as fases polas que pasa calquera produto audiovisual, centrándose especialmente na parte de edición de audio e de vídeo. Nestes momentos estanse a avaliar os traballos dos cento trece alumnos participantes no concurso. A entrega de premios (ao mellor guión literario, á mellor montaxe e ao mellor guión técnico) terá lugar en decembro en Santiago de Compostela.

Para o desenvolvemento do curso empregouse o sistema de videoconferencia e videocolaboración das aulas CeMIT, posibilitando a comunicación entre todos os participantes en tempo real a través de imaxe, chat, compartición e control de aplicacións remotas.

A actividade estaba dirixida a todos aqueles que desexaran obter unha preparación específica para incorporarse a un posto de traballo dentro dunha produtora, distribuidora ou canle de televisión, e a aqueles que desexsen mellorar ou actualizar a súa formación neste sector.

No marco do Plan de Dinamización 2012, a Rede CeMIT desenvolveu distintas actividades con temáticas relacionadas co sector multimedia e audiovisual como o curso sobre streaming de audio e vídeo, posicionamento web ou televisión en internet, entre outros.

O Programa de Formación da Rede CeMIT atópase cofinanciado polos Fondos Europeos de Desenvolvemento Rexional (FEDER) no marco do Programa Operativo FEDER Galicia 2007-2013.

A localización das aulas CeMIT e os contidos do Plan de Dinamización e da carta de servizos están dispoñibles non enlacehttp://cemit.xunta.es.