O Centro Demostrador TIC inicia o mes de outubro con tres actividades dirixidas a autónomos, emprendedores e xestores de departamentos de tecnoloxías da información. A primeira actividade será o martes 2 de outubro, cunha sesión demostradora a cargo da empresa Oracle baixo o título “Obteña o Máximo da súa Base de datos Oracle: Oracle Database 11g Release 2”.

O obxectivo da sesión é presentar unha plataforma que permite, aos departamentos de tecnoloxías da información, entregar máis información cun servizo de maior calidade, así como optimizar o uso dos seus orzamentos e reducir o risco dos cambios nos centros de datos.

Durante a xornada diversos poñentes expertos de Oracle, presentarán o produto “Oracle Grid Infrastucture”, a través de exposicións prácticas e a experiencia real dun cliente. Asemade, durante a sesión amosaranse os métodos máis eficientes para migrar desde versións previas así como as mellores prácticas para sacar partido de estas novas funcionalidades.

Na mesma semana, o 4 e o 5 de outubro terá lugar o taller de formación “Presenza en internet e redes sociais: Como usar internet para aumentar vendas”, onde Javier Rocamora, consultor especialista en marketing online, e-commerce e presenza en redes sociais, exporá como por en marcha unha tenda online e posicionala nos principais buscadores. A sesión do venres, estará orientada a redes sociais como ferramenta de marketing, así como, outros aspectos a ter en conta: reputación online, redes móviles, xeolocalización, ...

Por último, o día 9 de outubro Telefónica presentará en Galicia o proxecto Wayra (http://wayra.org/), unha iniciativa orientada ao emprendemento TIC que xa ten recorrido en España e Latinoamérica. Durante a presentación, Gary Steward, director xeral de Wayra e Josep Amoros, director da Academia Wayra de Madrid, esbozarán as claves do proxecto, que nace coa intención de identificar talentos no campo das TIC e impulsar o seu desenvolvemento a través dun apoio integral na xestión do proxecto e dotando aos emprendedores das ferramentas de financiamento necesarias.

A asistencia a todas as actividades é de balde, condicionada ao aforo do local e previa inscrición en liña a través do portal web do Centro Demostrador TIC (http://cdtic.xunta.es/actividades-introduccion).

Centro Demostrador TIC
O CDTIC, promovido pola Axencia para a Modernización Tecnolóxica de Galicia, ten como obxectivo facilitar ás empresas do sector tecnolóxico os medios para achegar a súa oferta de produtos ás empresas doutros sectores produtivos. O Centro constitúe un punto de encontro entre a oferta TIC e a demanda tecnolóxica do tecido empresarial galego.

Deste xeito, as empresas TIC poderán desenvolver solucións innovadoras adaptadas ás necesidades de mercado de empresas doutros sectores produtivos, que coñecerán os produtos TIC máis adecuados para optimizar os seus negocios e terán a oportunidade de trasladarlles demandas concretas ás empresas do ámbito tecnolóxico.

O Centro Demostrador TIC de Galicia é froito dun convenio de colaboración entre a Xunta de Galicia e o Ministerio de Industria, Turismo e Comercio, a través de red.es e a súa misión é ofrecer un espazo de encontro entre a oferta e a demanda tecnolóxica.