A sede da Axencia para a Modernización Tecnolóxica de Galicia (Amtega) acolleu, a través de videoconferencia, a xuntanza do Grupo de Traballo de Observatorios, Medidas e Indicadores do Comité Sectorial de Administración Electrónica, na que se definiu un novo cuestionario para a elaboración da enquisa sobre a eAdministración nas Comunidades Autónomas, un informe que se ven publicando dende o ano 2005.

A reunión, na que participaron representantes das 17 comunidades e do Ministerio de Facenda e Administracións Públicas, permitiu reorientar preguntas e determinados aspectos da metodoloxía empregada para conseguir uns datos coherentes e comparables entre Comunidades Autónomas.

Novo informe

O novo cuestionario, integrando as cuestións definidas na sesión aprobarse ao longo do próximo mes de xullo, para que se poida realizar a recollida de datos a partir de setembro e presentar o informe antes do fin de ano. Os informes publicados ata o de agora poden atoparse en http://administracionelectronica.gob.es.

Galicia coordinadora do Grupo de Traballo

Dende principios do 2012, a Xunta de Galicia coordina este Grupo de Traballo, que en 2013, propuxo revisar o cuestionario que se estaba a utilizar para optimizar a cuantificación dos avances e a incorporación de novos indicadores axeitados aos proxectos de Administración Electrónica desenvolvidos tanto polas Comunidades Autónomas como polo Ministerio.

A necesidade de ofrecer uns servizos máis avanzados e facilitar o desenvolvemento da administración electrónica, que supón importantes aforros de custo e tempo, tanto para os usuarios como para as propias administracións públicas obriga á posta en común de datos, metodoloxías e servizos.

Obxectivos do Grupo de Traballo

O Grupo, creado no marco do Comité Sectorial de Administración Electrónica, integrado na Conferencia Sectorial de Administración Pública, está formado principalmente por membros dos Observatorios autonómicos de sociedade da información e ten por obxectivos: monitorizar o avance da Administración Autonómica cara a administración electrónica, manter unha información actualizada sobre o estado das diferentes administracións na materia, establecer consenso sobre a metodoloxía de traballo e indicadores a observar, así como realizar recomendacións para o proceso de modernización das Comunidades Autónomas.