O presidente en funcións da Xunta, Alberto Núñez Feijóo, apostou, hoxe, por consolidar un sector TIC competitivo, innovador e xerador de emprego cualificado, capaz de facer fronte aos retos da nova economía do coñecemento. “Un dos obxectivos estratéxicos da nova lexislatura será impulsar o sector TIC galego como elemento transformador do tecido empresarial da Comunidade”, avanzou, durante a celebración da XVII Noite Galega das Telecomunicacións e da Sociedade da Información 2012. Smart cities: A tecnoloxía ao servizo dos cidadáns.

Feijóo subliñou que, na actual conxuntura económica, o uso das TIC debe ser un dos instrumentos clave para saírmos reforzados da crise, grazas ao seu papel transformador das estruturas económicas, sociais e culturais. E, neste sentido lembrou que o Goberno galego fixo desde o primeiro momento unha aposta clara pola integración das tecnoloxías en todos os ámbitos da sociedade galega coa aprobación da Axenda Dixital 2014.gal.

“Estamos a falar dunha folla de ruta –recordou- que dous anos despois da súa posta en marcha conseguiu avanzar na modernización da Administración e da Xustiza; na transformación do sistema educativo con iniciativas como Abalar; na vertebración territorial de Galicia grazas ao Plan de Banda Larga; na mellora continua da sanidade a través de proxectos tecnolóxicos nos que a comunidade é líder, como a receita electrónica ou o historial electrónico; e apoiando economicamente grandes proxectos tecnolóxicos innovadores. A estas medidas uniuse a creación da Axencia para a Modernización Tecnolóxica de Galicia”.

O presidente do Goberno galego explicou, así mesmo, que estas iniciativas da Axenda Dixital de Galicia terán continuidade con outras como: a aprobación na próxima lexislatura da Lei de desenvolvemento dixital de Galicia; seguir sendo pioneiros no impulso ás Redes de Telecomunicacións de alta velocidade en liña coas Directrices da UE que establece que en 2020 o 100% da poboación terán acceso a 30 Megas e o 50% a 100 Megas; e a posta en marcha de actuacións orientadas a promover a implementación práctica do Fogar Dixital, de xeito que se acheguen ao fogar un conxunto de servizos a través de infraestruturas e equipamento TIC, mellorando a calidade de vida das persoas e contribuíndo á sostibilidade dos servizos públicos.

Así mesmo, destacou a blindaxe das telecomunicacións como un servizo público máis para todos os galegos “e para conseguilo daremos continuidade á tramitación da Lei de impulso e ordenación das infraestruturas de telecomunicacións de Galicia”; a consolidación do Centro de Datos Integral, que entrou en funcionamento en setembro, como a infraestrutura chave para garantir o funcionamento dun sector público totalmente dixitalizado; continuar co impulso a innovación tecnolóxica nos sectores industriais estratéxicos de Galicia; e consolidar un sistema de apoio integral ao emprendemento TIC galego.

Logo de destacar que, a pesar do contexto de crise actual e da complicada situación que están atravesar moitas empresas, o sector das TIC está a ser capaz de manter o emprego; Feijóo concluíu a súa intervención felicitando a todos os galardoados pola súa contribución á mellora constante e á excelencia neste sector fundamental no desenvolvemento de Galicia. “Hoxe prémiase o enxeño e a creatividade, o esforzo e as ganas de seguir emprendendo e innovando, para que o progreso continúe impulsando á humanidade”.