A Consellería de Economía e Industria salientou que a creación de empresas en Galicia medrou en 2011 por segundo ano consecutivo, ao tempo que salientou os apoios habilitados polo Igape neste ámbito, a través de liñas como re-imaxina e re-emprende, que permitiron prestar apoio a máis de 900 proxectos, para mobilizar investimentos que superaron os 35 millóns de euros.

Segundo os datos difundidos hoxe polo INE, en Galicia creáronse en 2011 un total 4.085 novas compañías, co que se afianza a tendencia á alza iniciada en 2010, logo de tres anos de caídas. Por outra banda, crece en Galicia o número das sociedades que amplían capital nun 9,2% (1.871 sociedades), sendo este un incremento superior ao da media española, do 6,75%. No pasado decembro, en Galicia creáronse un 8,42% sociedades máis que en decembro de 2010.

Para impulsar a creación de novas empresas en Galicia, o actual Goberno galego impulsou programas como o re-Imaxina, destinado a financiar investimentos de emprendedores, microempresas ou pemes en crecemento, ou como o re-Emprende, destinado a respaldar os investimentos dos emprendedores.

Por outra banda, a través de XesGalicia, a Consellería de Economía e Industria habilitou dous Fondos de Capital Risco, cos que a Xunta aumenta o seu compromiso cos empresarios que decidan asumir o risco de por en marcha actividades innovadoras con amplas expectativas de crecemento e creación de emprego de calidade. A través do departamento que dirixe Javier Guerra estase a apostar pola fórmula do Capital Risco como unha das que mellor se adaptan ás necesidades de financiamento de proxectos innovadores. De xeito que creáronse os fondos Xes-Innova e Xes-Posibilita, dotados con mais de 3 millóns de euros. Xes-Innova atende, preferentemente, iniciativas vinculadas a campos como a biotecnoloxía, as telecomunicacións, as enerxías renovables e ao medio ambiente. Mentres que Xes-Posibilita, está orientado aos proxectos impulsados por emprendedores con discapacidade, como oportunidade para ter as mesmas oportunidades.

Neste mesmo ámbito, cómpre destacar igualmente un terceiro Fondo aprobado recentemente: o Fondo Tecnolóxico i2C. Esta nova ferramenta está orientada a apoiar iniciativas altamente innovadoras e atraer investimentos cara á I+D+i galega. Trátase dun fondo de capital risco, pioneiro na Comunidade, que ten reservada unha dotación de 20 millóns de euros e que ademais nace aberto á colaboración da iniciativa privada.