A Consellería de Economía e Industria, a través de BIC Galicia, organiza mañá martes 31 de xaneiro en colaboración co Clúster Tecnolóxico Empresarial das Ciencias da Vida (Bioga) a “Lonxa de inversores do sector biotecnolóxico”, unha iniciativa que ten por obxectivo atraer capital interesado en incentivar proxectos do sector biotecnolóxico galego con elevado potencial de crecemento.

O encontro, que terá lugar no Hotel Puerta del Camino de Santiago, está dirixido a emprendedores e persoal directivo de empresas biotecnolóxicas galegas interesadas na posta en marcha dun determinado proxecto emprendedor ou conseguir unha consolidación no mercado do mesmo, así como a entidades inversoras, que terán a oportunidade de coñecer proxectos biotecnolóxicos de interese.

Con esta iniciativa Bic Galicia e Bioga promoven a inversión produtiva no sector biotecnolóxico galego a través de encontros cara a cara entre emprendedores de proxectos, ligados básicamente ao eido investigador das universidades e fundacións hospitalarias galegas e empresas biotecnolóxicas da comunidade con potenciais inversionistas.

Este evento permitirá aos emprendedores e ás empresas máis innovadoras do sector biotecnolóxico galego presentar o seu plan de negocio ante un conxunto de inversores baixo o esquema networking, e de forma complementaria, daranse a coñecer os diferentes produtos e líñas de financiamento para o apoio de proxectos emprendedores biotecnolóxicos e as entidades representantes de produtos de financiamento de capital privado.

A lonxa contará coa participación de inversores dispostos a impulsar proxectos emprendedores de base biotecnolóxica como Ysios Capital, Suan Farma Biotech, Unirisco, La Caixa Capital Risc, Keiretsu ou Banco Sabadell. Tamén se contará coa participación de expertos na área de promoción e desenvolvemento de proxectos empresariais biotecnolóxicos innovadores.