A Consellería de Economía e Industria, a través de BIC Galicia, promove un encontro o vindeiro 25 de xaneiro para difundir entre empresarios e emprendedores galegos solucións innovadoras sobre bioplásticos e biotecidos téxtiles, co obxectivo de facilitar a innovación e o emprendemento en Galicia.

A xornada, que se desenvolverá no Museo Pedagóxico de Galicia, aberta tanto a empresarios e emprendedores como a tecnólogos, investigadores e alumnos universitarios, desenvolverase no Museo Pedagóxico de Galicia e servirá de peche ao proxecto Bioforo, orientado a detectar e divulgar oportunidades de negocio derivadas de solucións biotecnolóxicas con potencial de aplicación en distintas actividades empresariais de Galicia.

No marco do proxecto Bioforo desenvolvéronse durante os pasados meses de outubro e novembro dous encontros relacionados, respectivamente, cos bioplásticos e os biotecidos, e que reuniron a expertos en cada unha das áreas. A posta en común das conclusións servirá para analizar as tendencias dos mercados e para avaliar as posibilidades de desenvolvemento de solucións biotecnolóxicas que contribúan a impulsar novas actividades empresariais ou a mellorar o posicionamento das empresas galegas no mercado.

A primeira parte deste encontro formativo especializado estará centrada nos bioplásticos, envases e embalaxes activos e intelixentes. Entre os participantes haberá representantes do Clúster Alimentario de Galicia (Clusaga), da Área de nutrición e bromatoloxía da Universidade de Vigo e do Centro de investigacións tecnolóxicas da Universidade da Coruña, así como o experto en I+D+i alimentario Antonio Sartal.

A segunda parte da xornada do 25 de xaneiro estará dedicada aos biotecidos téxtiles, biofibras, materiais biodegradables e fibras téxtiles intelixentes. Participarán representantes do Clúster Galego de Téxtil-Moda, Cointega; do Laboratorio Ibércio de Nanotecnoloxía; do Citeve e da empresa Monsardi-Gonzabell, S.L.