O director do Igape, Javier Aguilera, salientou hoxe o proxecto vigués Tintorería Mimos como exemplo de emprendemento intelixente baseado nas tecnoloxías da información e a comunicación, destacando que o eixo principal do negocio desta empresa que desenvolve a súa actividade no barrio vigués de Navia será o servizo a domicilio asentado nun anovador sistema de xestión que permite aforrar custos e tempo.

Así, apoiándose na aplicación móbil “WASHinTOWN” e na páxina web www.washintown.com, Tintorería Mimos Navia ofrece tanto un servizo de recollida e entrega tanto a particulares como a empresas no que os clientes poden xestionar os seus propios pedidos e que se complementa con puntos de entrega repartidos por toda a cidade.

Dentro do abano de servizos e apoios habilitados pola Consellería de Economía e Industria para facilitar a posta en marcha e o desenvolvemento de novas empresas, no marco da Lei do emprendemento, está aberto ata o vindeiro 30 de abril o prazo para a presentación de solicitudes do programa Galicia Emprende, con axudas que poden cubrir ata o 50% dos proxectos con investimentos comprendidos entre os 35.000 e os 500.000 euros.

Este programa de apoio a novos proxectos e empresas de recente creación compleméntase cos fondos de capital risco preparados para apoiar proxectos de novos emprendedores ou proxectos con especiais compoñentes innovadores, dos que se informa a través da Unidade Galicia Emprende. Esta ferramenta está deseñada para achegar a cada proxecto emprendedor os servizos e os apoios que poden serlle de maior utilidade, dependendo das súas características e da fase de implantación na que se encontre.