A Consellería de Economía e Industria, como unha das entidades organizadoras do primeiro Salón Internacional da Tecnoloxía (SITE), apoia esta iniciativa coa finalidade de impulsar o desenvolvemento da tecnoloxía a prol da mellora da eficacia na xestión pública e tamén no eido empresarial, para fomentar a competitividade.

O director xeral de I+D+i da Consellería de Economía e Industria, Ricardo Capilla, participou hoxe na presentación do SITE, que celebrará a súa primeira edición do 17 ao 19 de novembro. Capilla destacou “a satisfacción da Xunta ao participar no comité organizador do SITE 2010, polo que supón de recoñecemento á intensa labor que se está realizando desde o Goberno galego para aproveitar todo o potencial das TIC e facilitar o acceso á Administración por parte da cidadanía, simplificando trámites e procedementos burocráticos”.

Neste sentido, cómpre destacar como un compromiso firme da Consellería de Economía e Industria a utilización de todos os recursos tecnolóxicos e de xestión ao seu dispor para axilizar a xestión das peticións de axuda que chegan a todos os seus departamentos, como é o caso das solicitudes do programa financeiro que será posible tramitar nun tempo medio de 45 días.

Ademais, o director xeral de I+D+i subliñou a necesidade de promover “novos enfoques na xestión da innovación”, que será un dos temas centrais a tratar no SITE 2010. Capilla engadiu que “precisamente este aspecto está a ser un dos eixes das políticas de innovación postas en marcha pola Xunta de Galicia para apoiar a mellora da competitividade empresarial”.

O director xeral tamén lembrou a posta en marcha no segundo semestre de 2009 da Rede de Xestores de Innovación de Galicia (XIGA), que se está a materializar na incorporación de 50 técnicos especialistas en innovación noutras tantas pemes galegas. A Consellería de Economía e Industria ocupouse da selección destes profesionais e do programa intensivo de formación que están a seguir para integrarse no cadro de persoal das empresas que o solicitaron, facéndose cargo ademais do cofinanciamento dos seus custos laborais durante os primeiros tres anos.

Do mesmo xeito, Capilla fixo fincapé na creación da Axencia Galega de Innovación, que será o organismo de referencia para a xestión das políticas de innovación da Xunta. Segundo expuxo, “este novo instrumento terá como obxectivo prioritario reconducir unha realidade empresarial marcada, en xeral, por unha escasa orientación á innovación estratéxica, traballando no establecemento de relacións de coñecemento entre empresas, especialmente entre as que posúen capacidade tractora”.

O Salón Internacional de Tecnoloxía pretende reunir na súa primeira edición a todas aquelas empresas con solucións nos ámbitos de comercio e transaccións electrónicas, tecnoloxía financeira e innovación tecnolóxica para o sector público. No marco do SITE’2010 celebrarase o congreso orientado a directivos de sistemas en banca, telecomunicacións e administracións públicas, responsables de tecnoloxías da información e as comunicacións (TIC) de todo tipo de empresas.

Neste sentido, o director xeral de I+D+i destacou o “importante papel” que o sector financeiro cumpre no Sistema de Innovación, en referencia a que “son moitas as innovacións tecnolóxicas que teñen a súa orixe na banca e se acaban estendendo á Administración pública e a outros ámbitos empresariais”.

Asemade, SITE’2010 abordará as claves da internacionalización no eido do comercio electrónico, os desenvolvementos para a interoperabilidade coas administracións públicas, os últimos modelos de desenvolvemento tecnolóxico en banca, os novos enfoques na xestión da innovación e os últimos avances tecnolóxicos desenvolvidos para un novo modelo de transaccións.