O presidente do Goberno galego, Alberto Núñez Feijóo, avanzou hoxe, na rolda de prensa do Consello, a aprobación do Plan de dotación e xestión sostible do posto de traballo, unha iniciativa que se enmarca dentro da implantación da eAdministración e do obxectivo da Xunta de acadar unha xestión dixital de todo o ciclo de vida dos documentos e procedementos administrativos.

Nun primeiro termo, o responsable autonómico subliñou que este plan prevé a posta en marcha de medidas que van desde a formación en novas tecnoloxías na EGAP ata a dotación de medios TIC adaptados a novas necesidades. “Buscamos garantir que todos os empregados públicos dispoñan dos medios tecnolóxicos axeitados ás súas funcións e a prestación de servizos dixitais para cidadáns e empresas”, precisou.

Cun investimento inicial de 4,2 millóns de euros, Feijóo afirmou que este plan suporá renovar o equipamento de ordenadores, a homoxeneización do software e a centralización das ferramentas de xestión dos equipamentos, acadando un aforro para a Administración de 1,2 millóns de euros anuais, “ao que hai que sumar un aforro doutros 350.000 euros derivado da compra centralizada de equipamento”.

No eido do novo equipamento, o plan prevé a renovación inicial do 25% dos ordenadores da Administración autonómica –aproximadamente 3.200 ordenadores-: 2.000 son renovacións de ordenadores en edificios administrativos e aulas de centros de formación xestionados pola Xunta; outros 1.200 ordenadores para centros públicos da área de benestar; 300 equipos de escaneado nas oficinas de rexistro; implantación dunha rede de videoconferencias en 9 salóns principais nas delegacións da Xunta, outros 13 equipos para salas e 33 máis portátiles para usos múltiples.

No que se refire ao software, Feijóo afirmou que se iniciará o plan de migración a software libre en 500 postos de usuario e habilitarase un catálogo con software corporativo adaptado a cada posto de traballo, garantindo a sostenibilidade do modelo, a calidade no soporte aos usuarios e a súa xestión.

Por ultimo, o plan tamén prevé a implantación, “que xa comezamos”, dunha ferramenta de xestión integral dos postos de traballo, que permita a distribución masiva de software, o control remoto dos postos de traballo e dispoñer dun inventario automatizado.

“En definitiva, máis de 4 millóns de euros para buscar a transformación da Administración autonómica nunha Administración dixital”, incidiu Feijóo, a modo de resumo.

Feijóo lembrou que nestes anos tense logrado que 9.000 empregados públicos teñan xa sinatura dixital grazas ao programa Kronos; que cidadáns e empresas poidan tramitar telematicamente 700 procedementos administrativos; evitar presentar documentación en poder da Administración; iniciar a dixitalización dos rexistros; e poñer en marcha o Arquivo Dixital de Galicia e o sistema de notificacións electrónicas da Administración.