Os Concellos de Monforte, Mos, Ponteareas, Tui e Verín terán acceso a servizos dixitais da Administración electrónica que ofrece o Estado. Estes municipios son os primeiros en adherirse ao convenio asinado no seu día pola Axencia para a Modernización Tecnolóxica de Galicia (Amtega) e o Ministerio de Facenda e Administracións Públicas, que permite á Administración autonómica actuar como nodo de interoperabilidade, facilitando a conexión das entidades locais a servizos proporcionados polo Estado.

Grazas ao acordo de servizos como a sinatura electrónica avanzada, o acceso a Pasaxe!, a plataforma de intermediación de datos por medios electrónicos, a interconexión de rexistros e o sistema de certificación e sinatura electrónica, ou o servizo de notificacións electrónicas estarán a disposición destes concellos e daqueles que o requiran de xeito gratuíto a través da plataforma tecnolóxica da Xunta de Galicia.

Son servizos fundamentais para avanzar na implantación da administración electrónica nas entidades locais e promover o uso compartido destas solucións tecnolóxicas, evitando duplicidades e reducindo custos.

Acceso a Pasaxe!
O acceso á plataforma de intermediación de datos Pasaxe! permitirá aos municipios galegos consultar de xeito electrónico datos de cidadáns dos que xa dispoñen outras administracións. Este servizo, ademais de axilizar os trámites, é de especial importancia para o cidadán, xa que evitará que teñan que presentar documentos ca mesma información en distintas Administracións. É un factor fundamental, para que os cidadáns poidan resolver as súas xestións coas administracións públicas nun único procedemento ou trámite, independentemente do nivel administrativo ao que se acheguen.

A Axencia para a Modernización Tecnolóxica vén traballando nesta liña coa implantación en 2011 do nodo de interoperabilidade en todas as consellerías, que permitiu eliminar a petición de documentación básica como DNI e o certificado de empadroamento. Este ano, a Amtega puxo en marcha Pasaxe! é a plataforma tecnolóxica que permite o intercambio de información entre as administracións autonómica, estatal e local evitando ao cidadán achegar documentación que xa obra en poder das administracións públicas.

Pasaxe! entrou en funcionamento con 19 procedementos, os existentes ata agora no portal de interoperabilidade que a Xunta puxo en marcha en 2010 para os seus departamentos, e que nos últimos tres anos evitou aos cidadáns a presentación de máis de 680.000 copias de documentos ou certificados de identidade, residencia e catastro. As consultas a este portal supuxeron un aforro por redución de cargas administrativas de máis de 780.000 euros.

Rexistro, sinatura e notificacións electrónicas
O acordo permitirá tamén o acceso ao Sistema de Interconexión de Rexistros, que posibilita o intercambio de asentos rexistrais de forma electrónica entre as oficinas de rexistros e os organismos competentes aforrando tempo e custes tanto a cidadáns como a administracións ademais de garantir a dispoñibilidade dos documentos.

O sistema de certificación e sinatura electrónica que o Ministerio pon á disposición das Administracións públicas é chave para a implantación e despregamento dos servizos da Administración electrónica, xa que proporciona os medios necesarios para asinar e autenticar documentos de xeito electrónico ofrecendo todas a garantías de seguridade a cidadáns e empresas nas súas relacións telemáticas coa Administración.

Outro dos servizos dispoñibles é o de de notificacións electrónicas que permite o envío e recepción de notificacións nunha caixa de correo persoal de forma segura e confidencial. Nos vindeiros meses se habilitará este canal e o obxectivo é incorporar a notificación electrónica en al menos 20 procedementos no ano 2015.

Red SARA
Finalmente, o acordo garante o acceso Rede de Comunicacións SARA que permite o intercambio seguro de información entre as aplicacións das Administración públicas. A Xunta xa vén empregando esta rede para prestar servizos electrónicos ás entidades locais no marco do Plan eConcellos, que se puxo en marcha en 2010

Ademais, a Xunta ven impulsando a Administración electrónica nas entidades locais grazas ao Plan eConcellos, que se iniciou en 2010 e ao que están adheridos o 100% dos conecellos, e que entre outras medidas conseguiu que o máis do 68% dos tramites entre Xunta e concellos son electrónicos fronte ao 0% de 2009.