A Xunta pon en marcha a segunda convocatoria de axudas para contratar Internet vía satélite para familias e pemes das zonas con máis dificultades de cobertura, nas que non é posible acceder á rede a través doutra tecnoloxía. Esta medida, que tivo unha primeira convocatoria en 2012, é unha das actuacións do Plan de Banda Larga da Xunta para facilitar o acceso a Internet a todos os galegos.

Estas axudas, publicadas hoxe no DOG, serán xestionadas polos operadores de telecomunicación que sexan acreditados pola Xunta como entidades colaboradoras e que desde mañá teñen un mes para presentar as súas solicitudes.

O prazo para que cidadáns e pemes poidan solicitar as axudas abrirase unha vez se publique no DOG a relación de entidades colaboradoras seleccionadas.

Esta medida é posible grazas ao convenio asinado o pasado ano entre a Axencia para a Modernización Tecnolóxica de Galicia (Amtega) e a Axencia Galega de Desenvolvemento Rural (Agader), que achegará o importe de 1.077.000 millóns de euros no período 2012- 2014.

Beneficiarios e importe das axudas
Os beneficiarios das axudas serán familias e empresas con enderezo en Galicia que non poidan dispor de acceso de banda larga, de cando menos 2Mbps, mediante outra tecnoloxía. O programa establece unha única subvención por enderezo destinada a sufragar os gastos de instalación así como o custo do equipamento do interior da vivenda ou empresa preciso para distribuír a sinal de banda larga, cunha contía máxima de 150 euros e condicionado á permanencia no servizo durante un ano.

O usuario deberá contratar un servizo de banda larga vía satélite de cando menos 2Mbps de velocidade de baixada. A alta de liña e o importe da tarifa do primeiro mes será asumido pola entidade colaboradora e, por tanto, gratuíto para os beneficiarios.

Con estas axudas a Administración autonómica busca avanzar un paso máis na equiparación da calidade de vida entre o rural e as contornas urbanas, axudando na fixación de habitantes e empresas no medio rural, e contribuíndo a mellorar a súa competitividade.

O Plan reduciu en máis dun 85% os galegos sen cobertura na Comunidade
A cobertura de internet vía satélite é a sexta e última liña do Plan de Banda Larga da Xunta e está destinada ás zonas da Comunidade máis illadas, dispersas e de orografía complicada, onde o acceso a Internet só é posible vía satélite.

Dous anos despois da súa posta en marcha o Plan de Banda Larga facilitou o acceso a Internet a case 670.000 habitantes dos 786.000 que carecían deste servizo en 2009. As actuacións desenvolvidas no Plan están a conseguir que Galicia reduza a fenda interna entre as zonas rurais e urbanas. En 2011 a diferenza media na dispoñibilidade de acceso á banda larga entre as provincias do interior e as do eixo atlántico pasou dun 15% a un 5,5%, e grazas ao plan en 2012 esta porcentaxe diminuíu ata un 3%.