A sede electrónica da Xunta permite a presentación ‘on line’ de 572 trámites administrativos a cidadáns e empresas
Esta canle permite unha nova forma de realizar as xestións coa Administración, máis fácil, sen condicionantes horarios nin de espazo e coa máxima seguridade
Nos primeiros oito meses de 2013 recibiu preto de 200.000 visitas e presentáronse 7.836 procedementos, máis do dobre que en todo 2012
A directora xeral de Avaliación e Reforma Administrativa, Natalia Prieto, destacou esta mañá o importante avance na incorporación de procedementos á sede electrónica, que a 31 de agosto permitía a cidadáns e empresas realizar 572 trámites online a través do enderezo https://sede.xunta.es; o que supera o 36% dos trámites totais perante a Administración autonómica.
En resposta a unha pregunta parlamentaria, Prieto tamén destacou que nos primeiros oito meses de 2013 houbo preto de 200.000 visitas á sede, case o dobre das visitas que recibiu en todo o ano pasado. Nese mesmo período, presentáronse 7.836 procedementos, máis do dobre que en todo 2012.
Os procedementos que tiveron máis presentacións electrónicas na sede durante os primeiros oito meses do ano foron as inscricións no rexistro de certificados de eficiencia enerxética de edificios, as subvención para entidades locais que contraten traballadores desempregados para a realización de obras e servizos de interese xeral e social; e as prazas xuvenís do programa campaña de verán.
Outro dato salientable é que o 45 por cento do total de trámites electrónicos foron realizados por empresas, fronte a o 39 por cento que corresponden a cidadáns e o 16 % restante corresponden a outras administracións, fundamentalmente concellos, ou entidades.
A directora xeral destacou ademais as importantes vantaxes que esta nova ferramenta aporta aos cidadáns que a empreguen. Así, destacou a rapidez e inmediatez na realización dos trámites, a eliminación de papel, a facilidade de acceso, a redución de cargas administrativas, e a seguridade e fiabilidade, xa que os trámites realizados a través da sede teñen a mesma validez que os presentados no Rexistro Xeral da Xunta.
Por último, Prieto aludiu ao importante aforro en tempos e custos, permitindo interactuar por medios electrónicos durante todos os días do ano e as 24 horas do día, con todos os órganos da Administración xeral da Xunta. Segundo destacou, agora pódense presentar solicitudes, escritos e comunicacións relativas aos diferentes procedementos administrativos, “sen condicionantes nin de espazos nin de horarios”.
