Os técnicos da Xunta resolveron esta mañá as incidencias rexistradas tras a implantación do Minerva NOX, a nova aplicación informática para a xestión procesual nos xulgados galegos, unha das primeiras accións necesarias para a posta en marcha da Nova Oficina Xudicial, que entra hoxe vigor. O cambio de aplicación iniciouse o pasado venres e rematou a primeira hora desta mañá, segundo o prazo previsto pola Administración. O Ministerio de Xustiza, que é o departamento que subministra o sistema de xestión procesual á Comunidade, remitiu á Administración autonómica a versión instalable do Minerva NOX o mércores, 28 de abril.

A Xunta de Galicia notificou aos secretarios xudiciais a migración da aplicación informática Minerva, no que se rexistran todos os documentos do expediente xudicial, o pasado xoves 29 de abril e trasladouse este aviso a través da intranet aos funcionarios xudiciais. No caso dos xulgados de garda, os técnicos informaron de forma presencial sobre o paso do Minerva ao Minerva NOX e informaron dos procedementos transitorios habilitados para evitar a paralización da actividade xudicial.

Mecanismo transitorio

A Xunta habilitou un dispositivo técnico para abordar a migración das 50 instalacións xudiciais que pola súa complexidade se prolongou durante a fin de semana e desde hoxe ás 8:00 da mañá está operativo, segundo o previsto. Como mecanismo transitorio e para evitar a paralización da actividade xudicial, facilitóuselles aos traballadores dos xulgados unhas plantillas de documentos que estiveron dispoñibles desde o mesmo luns para que despois as incorporaran ao novo sistema e para evitar a paralización da actividade xudicial. Só se interrompeu o uso do Minerva, o resto das aplicacións informáticas estaban dispoñibles e o cambio no sistema non supuxo a cancelación de ningún xuízo.

Adicionalmente a estas medidas, a Administración autonómica puxo en marcha un dispositivo de soporte especial para notificar incidencias e resolvelas na maior brevidade posible. Grazas a este dispositivo, que estará operativo durante toda a semana, esta mañá quedaron solucionadas as incidencias rexistradas.

Formación

A Escola Galega de Administración Pública (EGAP) ten convocado cursos para formar ao persoal da Administración de Xustiza nas reformas procesuais e na implantación da Nova Oficina Xudicial. Os cursos levan semanas en marcha, contan con 24 edicións e permiten formar a máis de 2.500 funcionarios.

Á súa vez, a Dirección Xeral de Xustiza segue a traballar para que a final deste ano, de xeito acompasado ao Ministerio de Xustiza e ás outras autonomías, se inicie a creación de servizos comúns procesuais e unidades administrativas nos edificios xudiciais.

Ademais, en decembro do ano pasado se crearon as comisións e os grupos de traballo para o deseño da implantación da Nova Oficina Xudicial en Galicia e están practicamente ultimados dous decretos para o seu desenvolvemento, que están en plena fase de debate cos sindicatos, porque a Xunta considera que a colaboración e a cooperación entre todos os sectores implicados é fundamental para garantir o éxito da implantación da Nova Oficina Xudicial.