A Dirección Xeral de Xuventude e Voluntariado está organizar entre os estudantes de ESO e Bacharelato a primeira edición do Parlamento Xove, unha iniciativa que pretende potenciar o diálogo como ferramenta de ideas propias entre a mocidade galega.

Parlamento Xove é unha competición entre centros de ensino da comunidade autónoma na que os participantes deberán integrarse en diversos equipos para investigar, escribir e debater sobre o tema proposto pola organización, que será se o uso das redes sociais separa ou une á mocidade.

Así, a iniciativa dividirase en dúas fases. Unha inicial de investigación e argumentación de ideas e outra final no que terá lugar o debate dialéctico en galego. Así, o obxectivo principal da actividade é que os estudantes poidan amosar as súas habilidades a nivel persoal e de grupo na selección de información, na expresión escrita e oral, na creatividade e no traballo en equipo.

O calendario de actividades será o seguinte: ata o 15 de febreiro os interesados poderán inscribirse na actuación; do 15 a 28 de febreiro terá lugar a entrega dos artigos; do 1 ao 15 de marzo deberá estar feito o dossier; o 26 de marzo Xuventude anunciará os equipos que pasarán á fase do debate que se celebrará o 24 de abril.

Para anotarse ao Parlamento Xove, os centros de ensino deberán primeiro comunicar a súa intención de participar nos teléfonos 981 545 822 ou 981 541 689. Cada un dos equipos estará formado por 6 alumnos e un profesor. Cada centro poderá anotar a dous equipos, aínda que o segundo que inscriba estará nunha lista de espera.

Unha vez adxudicado ao centro a súa praza ou prazas na competición , deberase enviar por correo certificado o formulario de inscrición antes do 15 de febreiro á Dirección Xeral de Xuventude e Voluntariado. Deberá incluír a composición do equipo e o selo do centro de ensino. O formulario pode descargarse na páxina oficial da competición, á que se accederá a través da web www.xuventude.net.

Xunto co formulario deberase remitir a fotocopia da matrícula ou o certificado de matriculación dos alumnos e alumnas co selo do colexio ou instituto e a fotocopia do DNI de cada membro do equipo.

O equipo gañador da primeira edición do Parlamento Xove acadará unha viaxe sorpresa e un notebook para os membros do equipo. O equipo que se enfronte no debate ao que gañe tamén será premiado cun notebook. Os que elaboren o mellor dossier de investigación recibirán unha videoconsola para cada un dos membros do equipo e o autor individual do mellor artigo terá un notebook e os seus cinco compañeiros un disco duro portátil.