A Axencia para a Modernización Tecnolóxica de Galicia e a Rede CeMIT súmanse á celebración do Día de Internet

Martes 09 de Maio de 2023

A Axencia para a Modernización Tecnolóxica de Galicia e a Rede CeMIT súmanse á celebración do Día de Internet

• A Rede CeMIT participa na conmemoración do Día de Internet co webinar “Inclusión dixital: a tecnoloxía como ferramenta de accesibilidade para a cidadanía”
• A programación formativa complementarase con iniciativas como o Escape Room “Cidadanía Dixital e Dereitos Dixitais na aula” e un ciclo de seminarios online gratuítos en colaboración coa Asociación Somos Digital
• O obxectivo destas actividades é seguir impulsando o acceso e o uso das tecnoloxías na sociedade situando ás persoas no centro dun entorno cada vez máis dixital


A Rede CeMIT, liderada pola Axencia para a Modernización Tecnolóxica de Galicia, participa nos actos conmemorativos do Día de Internet, que se celebra o 17 de maio, baixo o lema “Cidadanía dixital dereitos e oportunidades”, organizados pola Asociación Somos Digital

CeMIT desenvolverá unha sesión online para responsables de centros de competencias dixitais, en colaboración co GaiásTech, sobre a “Inclusión dixital: a tecnoloxía como ferramenta de accesibilidade para a cidadanía”, que terá lugar mañá, 9 de maio, en horario de 10:00 a 12:00 horas.  

Durante esta xornada, dirixida pola mestra en pedagoxía terapéutica e psicopedagoga Sara García, trataranse temas como o Deseño Universal para a Aprendizaxe (DUA), piar fundamental para o cambio cara á inclusión na formación.

A través desta sesión, a Rede CeMIT da continuidade á súa labor de impulso e mellora das competencias dixitais da cidadanía, así como a súa autonomía á hora de empregar a tecnoloxía, poñendo en valor o traballo realizado polo persoal dinamizador das súas aulas. 
 

Actividades para celebrar o Día de Internet

A programación formativa compleméntase con outras dúas propostas impulsadas desde a Asociación Somos Digital. A primeira delas será o Escape Room “Cidadanía Dixital e Dereitos Dixitais na aula”, ao que se poderá acceder desde os centros de competencias dixitais de toda España entre o 16 e o 30 de maio. Trátase dunha actividade interactiva que permitirá realizar unha viaxe polo “Mundo Dixital”, realizando preguntas sobre que é a Cidadanía Dixital e cales son os dereitos dixitais que garanten o acceso, o uso responsable e a seguridade no uso diario da tecnoloxía.  

O ciclo de webinars terá lugar entre o 4 e o 19 de maio e agrúpase en 4 temáticas: cidadanía dixital inclusivacidadanía dixital seguracidadanía dixital e e-Administración e cidadanía dixital e dereitos, que responden á actividade de promoción e acompañamento aos distintos grupos de poboación que veñen realizando os centros de competencias dixitais.
 

#diadeinternet nos centros de competencias dixitais

O 17 de maio é a data designada pola ONU para a conmemoración a nivel mundial do proxecto de dinamización social que se constrúe ao redor das novas tecnoloxías. O Día Mundial da Sociedade da Información celébrase anualmente e serve para dar a coñecer mellor a importancia que ten este recurso mundial e, en especial, as posibilidades que poden ofrecer as TIC á sociedade e á economía e as diferentes formas de reducir a fenda dixital.