A Axencia Tributaria de Galicia (ATRIGA) cederá información tributaria á Deputación da Coruña a través de procedementos telemáticos, de forma que o organismo provincial poderá acceder a esta documentación sen necesidade de pedirlla aos cidadáns. Isto permitirá axilizar os procedementos de resolución de expedientes e dotalos de maior fiabilidade.

Así o establece o convenio de colaboración asinado hoxe na Coruña pola conselleira de Facenda e presidenta da ATRIGA, Elena Muñoz Fonteriz, e o presidente da Deputación da Coruña, Diego Calvo. No acto de sinatura tamén estivo presente o director da ATRIGA, Ulpiano Villanueva.

A través deste convenio, a Deputación da Coruña poderá obter directamente da ATRIGA toda aquela información de tipo económico que precise para a concesión de subvencións, axudas ou para efectuar todo tipo de contratación con particulares sen necesidade de que os cidadáns teñan que reunila e achegala pola súa conta.

Por exemplo, a institución provincial recibirá da Axencia Tributaria de Galicia cada vez que o solicite o certificado de que unha entidade ou un contribuínte coruñés está ao corrente dos pagos coa Administración autonómica.

O acordo subscrito hoxe é o segundo destas características que impulsa a Axencia Tributaria de Galicia coas deputacións. Xa o asinou en Pontevedra a pasada semana, e o obxectivo da Consellería de Facenda é estendelo nas vindeiras semanas ao resto dos organismos provinciais.

Funcionamento menos burocrático e máis áxil
Este convenio enmárcase na liña de actuación seguida pola Administración autonómica de facilitar a realización de xestións e trámites burocráticos a todos os cidadáns. Trátase en todo caso de acadar un funcionamento máis áxil, máis eficaz e, na medida do posible, menos burocrático.

Neste sentido, a colaboración entre a Axencia Tributaria de Galicia e as deputacións provinciais garante a seguridade e a fiabilidade máxima dos datos obtidos a través de medios telemáticos.

A Consellería de Facenda foi xa pioneira no impulso da e-administración e en ofrecer servizos electrónicos para facilitar a realización de trámites a través de internet, ampliando prestacións e mellorando así as relacións entre Administración e cidadáns. Neste sentido, Elena Muñoz Fonteriz lembrou que dende 2003 xa é posible a presentación e o pago telemático de impostos autonómicos.