O plan Digitalent inicia o primeiro trimestre do ano con máis dunha ducia de actividades para fomentar o talento dixital na infancia, na adolescencia e na xuventude

Luns 30 de Xaneiro de 2023

O plan Digitalent inicia o primeiro trimestre do ano con máis dunha ducia de actividades para fomentar o talento dixital na infancia, na adolescencia e na xuventude

• Entre xaneiro e marzo de 2023 activaranse accións para fomentar as vocacións STEAM entre os máis novos e impulsaranse iniciativas para facilitar a adaptación a perfís especializados no eido universitario e da Formación profesional
• Charlas divulgativas, concursos, visitas e novas iniciativas como DXC Pinchos&Datos ou os TFGs solidarios impulsados por NTT Data
• A nova edición de Tecnólog@ por un día abrirá inscricións o próximo mes de marzo para o alumnado de 12 a 16 anos
• Os centros educativos teñan ata o 31 de xaneiro para inscribirse na VI edición de GenTech, que achega aos alumnos de Bacharelato as oportunidades laborais do sector TIC
• As empresas do Pacto Dixital continúan a implicarse no fomento do talento dixital da comunidade


A Axencia para a Modernización Tecnolóxica de Galicia continúa a poñer o foco no fomento do talento dixital da nosa comunidade, desta volta con ata quince actividades previstas ata o mes de marzo ao abeiro do Plan DigiTalent. Una vez máis, contará coa implicación do sector TIC galego, que mantén o seu compromiso de colaborar coa Axencia na xeración e a atracción do talento vencellado ás novas tendencias dixitais.
 

Espertar o interese nas profesións científico-tecnolóxicas entre os máis cativos

Durante a primeira semana do mes marzo, a Amtega traerá de volta unha nova edición do Programa Tecnólog@ por un día, no que rapaces e rapazas de 12 a 16 anos poderán visitar os centros de traballo das empresas colaboradoras e poderán experimentar en primeira persoa como se desenvolve unha xornada de traballo no sector TIC galego.

Doutra banda, durante todo o trimestre e ata o mes de maio, DXC Technology impulsa as Charlas DigiTalent DXC, coas que achega aos centros educativos de Secundaria e Bacharelato a Intelixencia Artificial, a Ciencia de Datos e outras temáticas vencelladas ás novas tendencias dixitais dende a experiencia dos seus profesionais. Ademais, impulsa unha nova edición de DXC Iberia Codes, un concurso de programación no que os rapaces e rapazas de 5º de primaria a 4º de secundaria poderán competir por parellas creando un videoxogo con Tecnoloxía Scratch, nesta edición coa misión de combater a crise enerxética a través do “Comando Enerxético”.
 
Un ano máis, os centros escolares de Galicia teñen a oportunidade de visitar as instalacións do Data Center de Altia, que contan con máis de 400 m² de salas técnicas.  Ademais, ata o 31 de xaneiro os centros educativos interesados poden inscribirse na IV GenTech, unha iniciativa que se volve a sumar ao catálogo do Plan DigiTalent este 2023 co obxectivo de achegar ao alumnado de Bacharelato a importancia das profesións tecnolóxicas e as oportunidades laborais que o sector TIC ofrece, dende unha perspectiva real, práctica a inspiradora.
 

Impulso dos novos perfís dixitais

O catálogo deste primeiro trimestre conta tamén con actuacións dirixidas a promover a adaptación de estudantes, titulados e profesionais aos perfís dixitais especializados demandados polo mercado laboral.

Neste primeiro trimestre iranse activando programas e accións formativas especializadas, obradoiros e workshops ou novas convocatorias para premios aos mellores Traballos de Fin de Grao e Mestrado, para e facilitar a adecuación continua das capacidades dixitais e maximizar as oportunidades de desenvolvemento profesional dos galegos e galegas ao contexto dixital e ás necesidades reais do tecido empresarial.
 
Así, Altia volve a poñer en marcha Altia FP Dual, coa quefavorece o contacto do alumnado de Formación Profesional co mundo laboral, alternando estancias formativas no Instituto e na empresa. Doutra banda, activa novas edicións de Altia Premia, Altia StagingeAltia Tech Day, tres iniciativas orientadas ao eido universitario co  obxectivo común de impulsar o talento en tecnoloxías avanzadas e disruptivas a través da realización traballos de Fin de Grao e Mestrado en liñas de investigación innovadoras, premios de recoñecemento e accións formativas especializadas impartidas polos profesionais da compañía.
 
Pola súa banda, DXC Technology repite co Observatorio DXC, un programa de asesoramento especializado ao alumnado universitario de disciplinas técnicas para realización de prácticas titorizadas, o desenvolvemento de proxectos de Fin de Grao e Mestrado cotitorizados e a celebración da VI edición do premio DXC ao mellor Traballo Fin de Mestrado en Big Data da Universidade de Santiago de Compostela.
 
Ademais, este ano achega ao Plan a novidosa iniciativa DXC Pinchos&Datos, un conxunto de encontros en locais de ocio de Santiago nun formato breve, distendido e altamente participativo, onde o público pode interactuar cos relatores invitados, expertos en novas tendencias dixitais como a tecnoloxía de datos, a Intelixencia Artificial ou a aprendizaxe automática.
 
Tamén orientado ao eido universitario, NTT Data pon en marcha a iniciativa TFGs solidarios, enmarcada na Cátedra en Diversidade e Tecnoloxía que a compañía mantén coa Universidade de A Coruña e que ofrece ao alumnado de Enxeñaría Informática a oportunidade de desenvolver Traballos de Fin de Grao de que aporten valor á sociedade, a través de temáticas vencelladas ás necesidades tecnolóxicas de organizacións sen ánimo de lucro.
 
Por último, NTT Data tamén pon e marcha en colaboración con HackABoos o Bootcamp Data Science, un curso intensivo de predición, análise e interpretación de datos para a optimización da toma de decisións; así como o Mestrado de especialización de Formación Profesional Dual en IA e Big Data, que está a impulsar xunto coa Consellería de Cultura, Educación, Formación Profesional e Universidades.
 
Toda a información sobre estas iniciativas, así como o resto de actuacións recollidas no catálogo DigiTalent encóntrase dispoñible no espazo web Digi Talent, que ofrece as datas, localizacións e instrucións para participar en constante actualización.