Entrega dos premios Eganet 2009
Eganet promociona con estes premios os proxectos realizados por empresas galegas no campo das TIC.
A Asociación de Empresas Galegas Adicadas a Internet e as Novas Tecnoloxías (Eganet) convocou onte, por sexto ano consecutivo, os Premios Eganet, co obxecto de recoñecer o labor de profesionais e empresas galegas que traballan con tesón no desenvolvemento do sector TIC en Galicia.
Con esta iniciativa Eganet quere promover e servir de plataforma de lanzamento para os proxectos realizados de xeito íntegro por empresas galegas no campo das tecnoloxías da información e as comunicacións, dando a coñecer a todos os sectores da sociedade galega os resultados das empresas de Galicia neste ámbito.
Eganet, a asociación de empresas galegas que desenvolven software e/ou servizos TIC, creouse no ano 2000 co obxectivo de aglutinar as empresas que representan o corazón das TIC e que abranguen as cinco principais áreas de negocio: Internet e medios online; Comunicación interactiva e novos medios; Consultoría e asesoramento TIC; Conectividade e integración de sistemas; e Desenvolvemento de software. Eganet basea o seu labor na defensa do libre mercado, presta servizos ás empresas asociadas e traballa para conseguir a adaptación da cidadanía ao uso das novas tecnoloxías como ferramentas de mellora ante a competitividade, tanto nos sectores empresariais como no desenvolvemento individual.
No acto de entrega dos galardóns, celebrado onte no Auditorio de Galicia en Santiago de Compostela, na categoría Publicidade Online recibiu o galardón La Nuestra Comunicación Publicitaria, empresa con sede en Oleiros, pola campaña de prevención de riscos laborais "Movemento contra a Lei de Murphy". A mellor Aplicación Online foi para o dicionario Digalego, posto en marcha pola editorial viguesa Ir Indo.
En Comercio Electrónico resultou premiada a web Planetapluton.com, posta en marcha por Buenas Ideas en Acción, pola súa especialización en produtos non dispoñíbles noutros comercios. A iniciativa a prol do Software Libre foi para a Oficina da USC dedicada a ese tema. O premio Comunicación Web recaeu en Fausto Deseño Asociados, por "Universo Galimatías".
Continental, e o seu videoxogo Evento Ligado á Extinción, mereceu o premio Cultura Dixital, mentres o de Mellor Ambiente Laboral foi para Imaxín Software, de Santiago de Compostela. O galardón Tecnoloxía Accesíble levouno NEO, con sede na Coruña, polo seu videotradutor virtual Bildo, a Comunicación Universal.
O premio e-Emprendedores foi para Teimas Desenvolvemento, que está a desenvolver a plataforma de xestión Teixo para as empresas implicadas na xestión de residuos.
Ademais, as empresas asociadas a Eganet decidiron outorgarlle o Premio Especial 2009 a Vindeira, plataforma tecnolóxica creada no ano 2006 como un punto de encontro e diálogo de todos os axentes relacionados co sector TIC. O seu obxectivo é o de fomentar e producir sinerxías entre os axentes galegos interesados nas tecnoloxías da información e das comunicacións, para participar na planificación da investigación e o desenvolvemento na industria TIC de Galicia e situala como líder en sectores estratéxicos.
Na entrega dos premios, en representación da Secretaría Xeral de Modernización e Innovación Tecnolóxica da Xunta de Galicia, un dos patrocinadores do acto, o subdirector xeral de Infraestruturas e de Telecomunicacións, Adrián Lence Paz, entregou o galardón na categoría de Software Libre.